लग्न झाल्यानंतर मंगळसूत्र घालणं ही आपली परंपरा मानली जाते. पण आजकाल बर्‍याचदा धावपळीच्या आयुष्यात आणि वाढत्या चोरीचकारीमुळे मोठं मंगळसूत्र घालणं शक्य नसतं किंवा महिलांना गळ्यात मंगळसूत्र सगळ्या कपड्यांवर घालणं सूट होत नाही असं वाटतं. त्यामुळे आता बदलत्या ट्रेंडनुसार ब्रेसलेट मंगळसूत्र घालताना आता बर्‍याच महिला दिसतात. मुळात हे ब्रेसलेटप्रमाणे असल्यामुळे कोणत्याही कपड्यांवर उठून आणि आकर्षक दिसतं आणि बर्‍याचदा पटकन एखाद्याच्या डोळ्यातही भरत नाही. तसंच तुमच्या हातात असल्यामुळे सुरक्षितही राहतं. आता ट्रेंडनुसार महिला मंगळसूत्र ब्रेसलेट अथवा रिंग्ज स्वरूपात घालताना दिसून येतात. त्यामुळे याचे आता वेगवेगळे डिझाईन्स यायला सुरूवात झाली आहे. अगदी सामान्य महिलांना आणि विशेषतः ऑफिसला जाणार्‍या महिलांना हे ब्रेसलेट मंगळसूत्र जास्त पसंतीला येत असल्याचे दिसून येत आहे.