सिन्नर: प्रतिनिधी
सिन्नरमध्ये झालेल्या बसस्थानक अपघात प्रकरणी पाच जणांवर गुन्हा दाखल झाला आहे. या दुर्घटनेत ९ वर्षांच्या आदर्श बोराडे या चिमुकल्याचा मृत्यू झाला होता. बसचे ब्रेक निकामी झाल्याने ती थेट फलाटावर चढली. या बसस्थानक अपघातप्रकरणी मृताच्या आजोबांनी पोलिसांत तक्रार दिली.
बसस्थानक अपघात: कोणाविरुद्ध गुन्हा दाखल?
मृत मुलाचे आजोबा ज्ञानेश्वर भालेराव यांनी सिन्नर पोलिसांत फिर्याद दिली. यानुसार, आगारप्रमुख हेमंत नेरकर यांच्यासह चालक ज्ञानेश्वर बनगैया, कार्यशाळाप्रमुख दिगंबर पुरी, पाळीप्रमुख रईस आणि वाहनांची देखभाल करणारा कर्मचारी अशा पाच जणांवर गुन्हा दाखल झाला आहे. पोलीस निरीक्षक हेमंतकुमार भामरे यांच्या मार्गदर्शनाखाली के. टी. खैरनार तपास करत आहेत.
अपघात कसा घडला?
बुधवारी सकाळी ११ वाजता आदर्श बोराडे त्याचे कुटुंब देवदर्शन करून सिन्नर बसस्थानकात उतरले. ते दापूरला जाण्यासाठी फलाटावर उभे होते. त्याचवेळी सिन्नर-देवपूर बस डेपोतून फलाटावर येत असताना तिचे ब्रेक फेल झाले. बस थेट फलाटावर चढली. या बसस्थानक अपघातमध्ये आदर्श चिरडून ठार झाला. अन्य तीन जण जखमी झाले.
नागरिकांचे आंदोलन आणि अधिकाऱ्यांचे आश्वासन
अपघातानंतर संतप्त नागरिक आणि नातेवाईकांनी नाशिक-पुणे महामार्गावर ‘रास्ता रोको’ आंदोलन केले. विभागीय वाहतूक अधिकारी कल्याणी ठोंगे यांनी घटनास्थळी धाव घेतली. त्यांनी दोषींवर कारवाई करण्याचे आणि भरपाई देण्याचे आश्वासन दिले.
विभागीय वाहतूक अधिकाऱ्यांकडून तिघांचे निलंबन
उपयंत्र अभियंता प्रसाद देसाई यांनी विभागीय वाहतूक अधिकारी कल्याणी ठोंगे यांना अहवाल पाठवला. यात तिघांनी कर्तव्यात कसूर केल्याचे स्पष्ट झाले. बसच्या दुरुस्तीसंदर्भात कार्यवाही बघण्याची जबाबदारी वाहन परीक्षक आणि पाळीप्रमुखांवर होती. तसेच, बस सुस्थितीत आहे की नाही हे पाहण्याची जबाबदारी चालकावर होती.
या निष्काळजीपणाबद्दल गुरुवारी तिघांवर निलंबनाची कारवाई झाली. सिन्नर आगारातील वाहन परीक्षक विलास केदार, पाळीप्रमुख अब्दुल रईस आणि चालक ज्ञानेश्वर बनगैया यांना निलंबित करण्यात आले.
संदर्भ: