2,100 रुपये कधी देणार?; विरोधकांकडून गदारोळ
मुंबई :
विधानसभा निवडणुकांमध्ये आपला करिश्मा दाखवलेल्या मुख्यमंत्री लाडकी बहीण योजनेची अद्याप चलती आहे. राज्यकर्त्यांकडून प्रत्येक कार्यक्रमात, भाषणात, निवडणूक प्रचारात आणि विधिमंडळात देखील लाडकी बहीण योजनेचा गवगवा केला जातो. लाडक्या बहिणींच्या आशीर्वादामुळेच महायुतीला मोठे यश मिळाले असून, लाडकी बहीण योजना कधीच बंद होणार नाही, असे आश्वासन मुख्यमंत्री आणि दोन्ही उपमुख्यमंत्री देत आहेत.
विरोधकांकडून या योजनेमुळे सरकारवर होत असलेल्या आर्थिक कर्जावर भाष्य केले जाते, तसेच या योजनेतील घोषणेप्रमाणे 2,100 रुपये बहिणींना कधी मिळणार असा सवालही उपस्थित केला जात आहे. विधिमंडळात काल लाडकी बहीण योजनेवरून मंत्री शंभूराज देसाई आणि आमदार जयंत पाटील चांगलीच जुगलबंदी पाहायला मिळाली.
लाडकी बहीण योजनेवरील चर्चेदरम्यान, विधानसभेत 1 नंबर आणि 2 नंबरहून जयंत पाटील आणि शंभूराज यांच्यात जुगलबंदी रंगल्याचे पाहायला मिळाली.
लाडकी बहीण योजना आणणारी व्यक्ती 2 नंबरवर आला, असे शिवसेना नेते शंभूराज देसाईंनी म्हटल्याचा उल्लेख जयंत पाटलांनी सभागृहात केला. 1 नंबरचा माणूस इथे नाही म्हणून शंभूराज आता 1 आणि 2 नंबरबाबत बोलत आहेत, असेही पाटील यांनी म्हटले. त्यावर मी वेगळे काही बोललो नाही, मुख्यमंत्री म्हणाले होते आम्ही आमच्या-आमच्यात पद बदलत असतो तेच मी बोललो, असे प्रत्युत्तर शिवसेना नेते तथा मंत्री शंभूराज देसाईंनी दिले. राज्य सरकारला या ’लाडक्या बहीण योजनेने फायदा झाला.’ मात्र, ज्या मुख्यमंत्र्यांनी ही योजना आणली ते 1 चे 2 नंबर झाले,असे जयंत पाटील यांनी म्हटले. त्यावर, एकनाथ शिंदे कायम 2 नंबरचं राहतील असे नाही. पदांची अदलाबदल होत असते, असा पलटवार शंभुराज देसाई यांनी केला. निवडणुकीत जेव्हा ही योजना झाली, तेव्हा अशा अटी यापूर्वी सांगितल्या होत्या का?, ज्या लोकांनी याचा चुकीचे फायदे घेतले त्यांच्यावर कारवाई करणार का? योजना जड जाऊ लागल्याने आता अटी आणि कंडीशन योजनांमध्ये घेतले आहेत, अशी टीका राष्ट्रवादी काँग्रेस शरद पवार गटाचे आमदार जयंत पाटील यांनी केली. जयंत पाटील यांच्या या आरोपावर मंत्री आदिती तटकरे यांनी प्रत्तुत्तर दिले. अनेक महिलांचे बँकेत खाते नाही. त्यामुळे त्या महिलांनी या पैशांसाठी घरातील कर्त्या पुरूषाचे खाते दिले आहे. यासाठीच केवायसी आपण केली अशी माहिती आदिती तटकरेंनी सभागृहात दिली.