महात्मा गांधी विद्यामंदिर संस्थेचा उपक्रम
नाशिक : प्रतिनिधी
नाशिक तीर्थक्षेत्री पुढील वर्षात जागतिक दर्जाचा सिंहस्थ कुंभमेळा 2027 महोत्सव भरणार आहे. सिंहस्थ कुंभमेळा हायटेक तसेच पर्यावरणपूरक करण्यासाठी केंद्र व राज्य सरकारचे प्रयत्न सुरू आहेत. या प्रयत्नांमध्ये महात्मा गांधी विद्यामंदिर शिक्षण संस्था व आदिवासी सेवा समिती, नाशिक संस्थाअंतर्गत नाशिक कॅम्पसमधील महाविद्यालयांचा सक्रिय सहभाग राहणार आहे.
याचाच भाग म्हणून संस्थेच्या वतीने ‘पावन गोदावरी-स्वच्छ गोदावरी-सुंदर गोदावरी’चा संदेश सर्वांपर्यंत पोहोचविण्याच्या उद्देशाने शहरातील गोदावरी नदी व गोदाघाट भागात काल रविवारी (दि. 28) स्वच्छता मोहीम राबविण्यात आली.
या मोहिमेत सुमारे 250 किलोवर कचरा व प्लास्टिकचे संकलन करून त्याची विल्हेवाट लावण्यात आली, अशी माहिती महात्मा गांधी विद्यामंदिर संस्थेचे समन्वयक व सावित्रीबाई फुले पुणे विद्यापीठाचे सिनेट सदस्य डॉ. अपूर्व हिरे यांनी दिली. त्याचवेळी संस्थेंतर्गत पदाधिकारी, प्राचार्य, प्राध्यापकवृंद, शिक्षक-शिक्षकेतरांसह एनएसएस-एनसीसी कॅडेट विद्यार्थ्यांच्या उत्स्फूर्त सहभागात राबविण्यात आलेल्या मोहिमेस रामतीर्थ गोदावरी सेवा समिती व नाशिक फ्लॉगर्स यांचे बहुमोल सहकार्य लाभले. गोदाघाट येथील देवमामलेदार यशवंतराव महाराज मंदिराच्या पटांगणात काल सकाळी संस्थेचे समन्वयक डॉ. अपूर्व हिरे यांच्या हस्ते या स्वच्छता मोहिमेचा शुभारंभ करण्यात आला. त्यावेळी डॉ. अपूर्व हिरे बोलत होते. याप्रसंगी दीपक भगत, रामतीर्थ गोदावरी सेवा समितीचे सदस्य, शिवाजी दादा बोंडार्डे, चैतन्य गायधनी, अक्षय शेरताटे, इस्कॉन परिवाराचे नृसिंह कृपादास महाराज, महात्मा गांधी विद्यामंदिर व आदिवासी सेवा समिती संचलित हिरे नॉलेज कॅम्पस, फार्मसी महाविद्यालय, कर्मवीर भाऊसाहेब हिरे दंत महाविद्यालय व रुग्णालय, पंचवटी कॉलेज ऑफ मॅनेजमेंट, इन्स्टिट्यूट ऑफ इंडस्ट्रीयल टेक्नॉलॉजी, पंचवटी कॉलेज तसेच एक्सेल हाय इंटरनॅशनल इंग्लिश मीडियम स्कूल आदी शिक्षण संस्थांचे प्राचार्य व पुणे विद्यापीठाचे अधिसभा सदस्य डॉ. राजेंद्र भांबर, डॉ. बी. एस. जगदाळे, डॉ. संतोष तांबे, डॉ. चंद्रकांत दिघावकर, डॉ. प्रमोद कातकडे, मुख्य कार्यकारी अधिकारी बी. एस. यादव आदींसह मान्यवर उपस्थित होते.
Godavari gets a makeover from cleanliness ambassadors