मॉकड्रील असल्याचे माहीत पडल्यावर सर्वांनी सुटकेचा निःश्वास सोडला
इगतपुरी : प्रतिनिधी
शुक्रवारी (दि. 23) दुपारी साडेबारा वाजेच्या सुमारास इगतपुरी रेल्वे बुकिंग व प्रतीक्षालय येथे दोन दहशतवादी संशयितरीत्या लपून बसल्याची खबर इगतपुरी लोहमार्ग पोलीस निरीक्षक बालाजी शेंडगे यांना समजली. मात्र, हा सर्व प्रकार मॉकड्रील असल्याचे माहीत पडल्यावर सर्वांनी सुटकेचा निःश्वास सोडला.
त्यांनी तात्काळ रेल्वे सुरक्षा बलाचे पोलीस निरीक्षक राजकुमार धनवीज यांना कळवून घटनास्थळी धाव घेऊन सदर परिसराचा ताबा घेऊन परिसर निर्मनुष्य करून योग्य तो बंदोबस्त तैनात करण्यात आला. लागलीच क्यूआरटी पथक, नाशिक ग्रामीण पोलीस पथक, कल्याण येथील सुरक्षा बल पथक, डॉग स्कॉड पथक, ठाणे येथील पोलीस अधिकारी व पोलीस पथक, इगतपुरी नगरपरिषद अग्निशमन पथक, इगतपुरी ग्रामीण रुग्णालयाचे पथक यांना पाचारण करण्यात आले.
प्रथम क्यूआरटी पथकाने मोहीम राबवून प्रतीक्षालयाचा ताबा घेतला.लपून बसलेल्या दोन संशयितांना ताब्यात घेऊन त्यांना निशस्त्र करून प्रतीक्षालयाबाहेर आणले.
कल्याण येथील डॉग स्कॉडच्या स्नुफी डॉग व रॉकी डॉग यांच्या मदतीने दोन संशयितांकडे मिळून आलेल्या बॅगेची तपासणी करण्यात आली. डॉगने बॉम्बसदृश वस्तू असल्याचे सूचित केले. बॉम्बस्कॉड पथकाने त्यांच्या जवळील यंत्रसामग्रीने बॅगची तपासणी केली असता, त्यात दिवाळीचे सुतळी बॉम्बचे फटाके व घरगुती वापराचा चाकू व कपडे मिळून आले. सदरची बॅग व दोन संशयित आरोपी यांना लोहमार्ग पोलिसांच्या ताब्यात देण्यात आले.ही कारवाई सुरू असताना रेल्वे प्रवासी व नागरिकांनी एकच गर्दी केली होती. मात्र, हा सर्व प्रकार मॉकड्रील असल्याचे माहीत पडल्यावर सर्वांनी सुटकेचा
निःश्वास सोडला. 26 जानेवारी भारतीय प्रजासत्ताक दिनाच्या पार्श्वभूमीवर हे मॉकड्रील राबवण्यात आल्याची माहिती लोहमार्ग पोलीस ठाण्याचे हेमंत घरटे यांनी दिली.