मुंबई : प्रतिनिधी
शिवसेना (उद्धव बाळासाहेब ठाकरे) पक्षाचे 6 लोकसभा खासदार फुटून एकनाथ शिंदे यांच्या शिवसेनेत प्रवेश करणार असल्याच्या वृत्ताने महाराष्ट्राच्या राजकारणात प्रचंड खळबळ उडाली आहे. या संभाव्य मोठ्या फुटीवर संतप्त प्रतिक्रिया देताना ठाकरे गटाचे नेते, खासदार संजय राऊत यांनी बंडखोरांना थेट रस्त्यावर उतरून धडा शिकवण्याचा इशारा दिला आहे.
आमची लढाई आता लोकसभेत, कोर्टात आणि रस्त्यावरही चालेल; आता रस्त्यावरची लढाई सुरू झाली असून, आमचे ‘ऑपरेशन तुडवा’ सुरू होणार, असा अत्यंत आक्रमक आणि गर्भित इशारा संजय राऊत यांनी दिल्लीतील पत्रकार परिषदेत दिला. गटनेते अरविंद सावंत यांनीही खासदार किंवा आमदार फुटला तर त्याला रस्त्यात तुडवा, या शिवसेनाप्रमुख बाळासाहेब ठाकरेंच्या जुन्या विधानाचा हवाला देत बंडखोरांविरोधात आक्रमक पवित्रा घेतला
आहे.
संजय राऊत आणि ठाकरे गटाच्या या आक्रमक भूमिकेनंतर आणि ‘ऑपरेशन तुडवा’च्या धमकीची गंभीर दखल घेत राज्य गृह विभागाने तातडीने पावले उचलली आहेत. राज्य गुप्तवार्ता विभागाने (एसआयडी) जारी केलेल्या आदेशानुसार, सुरक्षेच्या कारणास्तव ठाकरे गटातून बाहेर पडण्याच्या तयारीत असलेल्या 6 खासदारांना तातडीने ‘वाय प्लस’ दर्जाची सुरक्षा व्यवस्था पुरवण्याचे निर्देश पोलिसांना देण्यात आले आहेत. यामध्ये खासदार संजय देशमुख, संजय जाधव, संजय दिना पाटील, नागेश पाटील आष्टीकर, ओमराजे निंबाळकर आणि भाऊसाहेब वाकचौरे यांचा समावेश आहे. संभाव्य कायदा आणि सुव्यवस्थेची परिस्थिती पाहता, स्थानिक पातळीवरील सुरक्षा समित्या या खासदारांच्या सुरक्षेचा पुढील आढावा घेतील. चार वर्षांतील शिवसेनेतील ही दुसरी मोठी फूट मानली जात असून, यामुळे राज्याचे राजकीय वातावरण कमालीचे तापले आहे. बंडखोर खासदारांना ‘वाय प्लस’ सुरक्षा संजय दिना पाटील, नागेश पाटील आष्टीकर, ओमराजे निंबाळकर आणि भाऊसाहेब वाकचौरे यांचा समावेश आहे.