नाशिक : प्रतिनिधी
मागील काही दिवसांपासून माझ्याशी संबंधित फोटो आणि पोस्ट जाणूनबुजून काही समाज माध्यमांवर म्हणजेच सोशल मीडिया, फेसबुक , इंस्टाग्राम, एक्स व इतर न्यूज पोर्टलवरून प्रसारित करण्यात येत आहेत. या फोटोसंदर्भात वस्तुस्थिती जनतेसमोर मांडणे आवश्यक आहे. या फोटोमधील मुलगी माझ्या घनिष्ट कौटुंबिक संबंधातील मुलगी आहे. माझ्या घरगुती, कौटुंबिक व धार्मिक कार्यक्रमात त्यांचे कुटुंबीय व माझे कुटुंबीय एकत्र येत असतो. त्यांचे कुटुंबीय व माझे कुटुंबीय यांचे माझ्यासोबत अनेक फोटो आहेत. ते फोटो आमचे खासगी आहेत.
माझ्या फोटोमध्ये आधुनिक तंत्रज्ञानाचा वापर करून मूळ फोटोग्राफमध्ये क्रॉपिंग करून छेडछाड करण्यात आलेली आहे. अशी माहिती मंत्री गिरीश महाजन यांनी दिली. फोटोमध्ये छेडछाड व फेरफार करून व त्यातून बदनामी करण्याचा प्रयत्न करण्यात आला आहे. ही महाराष्ट्राच्या राजकारणाची संस्कृती नाही. ज्या लोकांनी अशा चुकीच्या पद्धतीने समाज माध्यमावर फोटो प्रसारित करून बदनामीचा प्रयत्न केला आहे. त्यांच्या विरुद्ध आम्ही कायदेशीर तक्रार सायबर पोलिस स्टेशन केलेली आहे. त्यानुषंगाने रीतसर गुन्हा दाखल झाला आहे. पोलिसांनी या गुन्ह्याची दखल घेऊन संबंधित समाजमाध्यमच्या अकाउंंटधारकांना सदर मजकूर काढून टाकण्यासाठी रीतसर व कायदेशीर नोटीस दिली आहे. कायदेशीर प्रक्रिया सुरू असतानादेखील काही समाजमाध्यमावर अजूनही बदनामीकारक मजकूर प्रसारित करण्यात येत आहे. अशा अकाउंंटधारकांविरुद्ध न्यायालयात जाऊन कायदेशीर कार्यवाही करण्याबाबत दाद मागणार आहे.
समाजमाध्यमाचा वापर करून व्यक्तिगत, कौटुंबिक व महिलेची बदनामी करण्याचा केलेला हा प्रयत्न ही महाराष्ट्राच्या राजकारणातील पातळी किती खाली गेली आहे यावरून लक्षात येते. आम्ही दाखल केलेल्या तक्रारीच्या अनुषंगाने सायबर पोलिसांनी सायबर तंत्रज्ञांचा वापर करून शोध घेतला असता. सदरील फोटोमध्ये छेडछाड/ फेरफार करून बदल करण्यात आला आहे, असे तांत्रिक तपासांती सायबर पोलिसांनी प्रमाणित केले आहे.
सत्य जनतेसमोर येईल आणि कायद्याच्या चौकटीत राहून दोषींवर योग्य ती कारवाई होईल, याबाबत मला पूर्ण विश्वास आहे, असे मंत्री महाजन यांनी स्पष्ट केले.
Use of family photos after tampering and alteration: Minister Girish Mahajan