पुणे/सांगली : प्रतिनिधी
संत ज्ञानेश्वर महाराजांच्या पालखी सोहळ्यात सहभागी झालेल्या वारकर्‍यांच्या दिंडीला सासवड-जेजुरी मार्गावर एका भरधाव ट्रकने जोरदार धडक दिल्याने भीषण अपघात झाला. या दुर्घटनेत सांगली जिल्ह्यातील मिरज तालुक्यातील तीन महिला वारकर्‍यांचा मृत्यू झाला असून, इतर तीन वारकरी गंभीर जखमी झाले आहेत.
कसबे डिग्रज येथून 6 जुलै रोजी दीडशेहून अधिक वारकर्‍यांसह निघालेल्या या दिंडीवर प्रवासाच्या पाचव्या दिवशीच काळाने हा आघात केला.
या अपघातात नंदा पवार (वय 60, रा. कसबे डिग्रज), माधवी राजाराम सलगरे (वय 55, रा. मालगाव) आणि राजश्री शंकर भोसले (वय 55, रा. कवलापूर) या महिलांनी प्राण गमावले आहेत. या हृदयद्रावक घटनेची माहिती मिळताच कसबे डिग्रज, मालगाव आणि कवलापूर या तिन्ही गावांवर शोककळा पसरली. ग्रामस्थांनी उत्स्फूर्तपणे बंद पाळून मृत वारकरी महिलांना श्रद्धांजली वाहिली.
उपमुख्यमंत्री सुनेत्रा पवार यांच्याकडून मदत
अपघाताचे वृत्त समजताच उपमुख्यमंत्री तथा पुणे जिल्ह्याच्या पालकमंत्री सुनेत्रा अजित पवार यांनी जेजुरी ग्रामीण रुग्णालयात धाव घेत अपघातग्रस्त आणि जखमी वारकर्‍यांची भेट घेतली. या वेदनादायी घटनेबाबत दुःख व्यक्त करत त्यांनी मृतांच्या वारसांना प्रत्येकी पाच लाख रुपयांची आर्थिक मदत जाहीर केली, तसेच जखमी वारकर्‍यांवर शासनातर्फे मोफत उपचार करण्याचे निर्देश संबंधित वैद्यकीय अधिकार्‍यांना दिले. पंढरपूरकडे जाणार्‍या वारकर्‍यांची सुरक्षा ही सर्वांची सामूहिक जबाबदारी असून, वाहनचालकांनी वारी मार्गावर अत्यंत सावधगिरीने वाहने चालवावीत, असे आवाहनही त्यांनी यावेळी केले.
Accident involving Warkari procession; three women killed.