त्र्यंबकेश्वर : प्रतिनिधी
मनासारखा बरसणारा पाऊस आणि फ्रेंडशिप डेचे (मैत्री दिन) औचित्य साधत रविवारी पर्यटकांनी वर्षा सहलीसाठी त्र्यंबकेश्वर परिसराला पसंती दिली. दमदार पावसामुळे नदी-नाले खळाळून वाहत असून, पहिने परिसर पर्यटकांच्या गर्दीने फुलून गेला आहे.
पहाडी भागातील नेकलेस धबधबा वर्षा सहलीला येणार्या पर्यटकांचे मुख्य आकर्षण ठरत आहे. शनिवार व रविवारी मिळून किमान दोन हजार पर्यटक अधिकृत तिकीट काढून धबधबा परिसरात प्रवेश करत आहेत. याशिवाय, त्याहून चारपट अधिक नागरिक आजूबाजूच्या हिरवळीवर आणि नदीच्या प्रवाहात निसर्गसहलीचा आनंद लुटत आहेत. दुगारवाडी धबधबा येथे घडलेल्या अपघातामुळे तेथे प्रवेशबंदी करण्यात आली आहे. परिणामी, पर्यटकांचा सगळा ओघ पहिने परिसराकडे वळला आहे. याशिवाय अंजनेरी, ब्रह्मगिरी आणि हरिहर किल्ल्यावरही पर्यटकांची मोठी गर्दी पाहायला मिळाली. नाशिक-त्र्यंबक रस्ता आणि पेगलवाडी फाटा ते पहिने घाट मार्गावर वाहनांच्या लांबच लांब रांगा दिसून आल्या.
हुल्लडबाजांचा उच्छाद
काही हुल्लडबाजांचा उपद्रव वाढला असून, बेफाम वेगाने वाहने चालवणे, शिवीगाळ व आपापसांत हाणामारीच्या घटना घडत आहेत. यामुळे स्थानिक नागरिक व कुटुंबासह आलेल्या पर्यटकांना मोठा त्रास सहन करावा लागत आहे. या भागात पोलीस बंदोबस्त वाढवून हुल्लडबाजी करणार्यांवर कडक कारवाई करावी, अशी मागणी ग्रामस्थांनी केली आहे.
Youthful enthusiasm abounds at Pahine Bari on Friendship Day!