ओस्लो (नॉर्वे) :
यंदाचा मानाचा शांततेचा नोबेल पुरस्कार भारतीय वंशाच्या दक्षिण आफ्रिकेतील ज्येष्ठ विधिज्ञ नवनेथम नवी पिल्लई यांना जाहीर झाला आहे. नॉर्वेजियन नोबेल समितीने ही घोषणा केली.
नोबेल समितीचे अध्यक्ष योर्गेन वाटने फ्रिडनेस यांनी सांगितले की, शांतता आणि आंतरराष्ट्रीय कायद्याला प्रोत्साहन देण्यासाठी केलेल्या प्रयत्नांसाठी पिल्लई यांना हा पुरस्कार देण्यात येत आहे.
समितीने म्हटले आहे की, जगात युद्ध आणि संघर्षांची संख्या वाढत असताना आणि आंतरराष्ट्रीय कायद्याच्या संस्था राजकीय हल्ल्याखाली असताना, बळाचा वापर न करता संघर्ष सोडवण्याची क्षमता आंतरराष्ट्रीय कायद्यावर अवलंबून असते, याची आठवण समितीला करून द्यायची आहे. यंदा शांततेच्या नोबेल पुरस्काराचे 125 वे वर्ष आहे.
कोण आहेत नवी पिल्लई?
♦ 23 सप्टेंबर 1941 रोजी दक्षिण आफ्रिकेतील डर्बन शहरातील क्लेअरवूड येथे जन्म. त्यांचे आजोबा भारतातून उसाच्या मळ्यात काम करण्यासाठी दक्षिण आफ्रिकेत गेले होते. तामिळ वंशाच्या कुटुंबातून येतात.
♦ वर्णभेदाच्या काळात वाढल्या. 1967 मध्ये नाताळ प्रांतात स्वतःची वकिली सुरू करणार्‍या त्या पहिल्या कृष्णवर्णीय महिला ठरल्या. त्यांनी नेल्सन मंडेला यांच्यासह अनेक वर्णभेदविरोधी कार्यकर्त्यांसाठी कोर्टात लढा दिला.
♦ दक्षिण आफ्रिकेच्या हायकोर्टाच्या पहिल्या अश्वेत महिला न्यायाधीश बनल्या.
♦ 1999 ते 2003 – रवांडा नरसंहारासाठीच्या आंतरराष्ट्रीय गुन्हेगारी न्यायाधिकरणाच्या अध्यक्ष.
♦ 2003 ते 2008 – आंतरराष्ट्रीय गुन्हेगारी न्यायालयाच्या न्यायाधीश.
♦ 2008 ते 2014 – संयुक्त राष्ट्रांच्या मानवाधिकार उच्चायुक्त.
♦ सध्या त्या आंतरराष्ट्रीय न्यायालयात न्यायाधीश आहेत.
Nobel Peace Prize announced for Indian-origin Navi Pillay.