दरवाढीमुळे उत्पादक शेतकर्‍यांना सुगीचे दिवस येण्याची शक्यता
लासलगाव : वार्ताहर
नाशिक जिल्ह्यात यंदाच्या खरीप हंगामात लहरी हवामान आणि पावसाच्या मोठ्या खंडामुळे सोयाबीन उत्पादनाला मोठा फटका बसला आहे. जिल्ह्यातील मुख्य सोयाबीन उत्पादक पट्ट्यात सरासरीपेक्षा कमी पाऊस झाल्याने उत्पादनात लक्षणीय घट झाली आहे. मात्र, दुसरीकडे बाजारात सोयाबीनची आवक कमी राहण्याची शक्यता आणि वाढती मागणी यामुळे दरात तेजी येण्याचे संकेत आहेत. परिणामी, उत्पादन घटले तरी वाढीव दरामुळे सोयाबीन उत्पादक शेतकर्‍यांना सुगीचे दिवस येतील, अशी आशादायक चित्र निर्माण झाले आहे.
यंदा नाशिक जिल्ह्यातील निफाड, सिन्नर, येवला, नांदगाव, चांदवड या भागात सोयाबीनची मोठ्या प्रमाणावर पेरणी झाली होती. सुरुवातीला पावसाने चांगली साथ दिल्याने पिके जोमात होती. मात्र, ऑगस्ट आणि सप्टेंबर या पिकाच्या महत्त्वाच्या टप्प्यात पावसाने मोठा खंड दिला. शेंगा भरण्याच्या वेळेसच पाणी न मिळाल्याने दाण्यांचा आकार लहान राहिला आहे. काही ठिकाणी पिके अकाली वाळून गेली. कृषी विभागाच्या प्राथमिक अंदाजानुसार, जिल्ह्यात सोयाबीनच्या उत्पादनात 25 ते 30 टक्क्यांपर्यंत घट होण्याची भीती वर्तवली जात आहे.
उत्पादन घटले, पण बाजारभाव वधारणार
कृषी क्षेत्रातील जाणकार आणि बाजार समितीच्या तज्ज्ञांनुसार, केवळ नाशिक जिल्ह्यातच नव्हे, तर राज्यातील इतरही अनेक भागांत सोयाबीन उत्पादनावर परिणाम झाला आहे. पुरवठा कमी आणि मागणी जास्त अशा स्थितीमुळे बाजारात सोयाबीनला चांगला उठाव मिळण्याची शक्यता आहे. सध्या बाजारपेठेत सोयाबीनचे दर स्थिर असले तरी नवीन मालाची आवक सुरू होताच आणि आंतरराष्ट्रीय बाजारात खाद्यतेलाच्या किमती सुधारल्यास सोयाबीनचे भाव हमीभावापेक्षा अधिक राहतील, असा
अंदाज आहे.
चिंता अन् कृषी विभागाचे आवाहन
उत्पादनात घट झाल्यामुळे सध्या शेतकरी चिंतेत आहेत. एकरी निघणारे उत्पादन घटल्याने मळणीचा (थ्रेशिंग) खर्च निघेल की नाही, अशी भीती काही भागात व्यक्त होत आहे. या पार्श्वभूमीवर, कृषी विभागाने शेतकर्‍यांना काढणीनंतर सोयाबीनची घाईगडबडीने विक्री न करता, बाजाराचा अंदाज घेऊन टप्प्याटप्प्याने माल विक्रीस आणण्याचे आवाहन केले आहे. तसेच सोयाबीन सुरक्षित ठिकाणी साठवून ठेवल्यास चांगला भाव मिळवता येईल, असे सांगण्यात आले आहे.
Decline in soybean production due to lack of rain.