आडगाव परिसरात घरफोडी; सव्वापाच लाखांचे दागिने व रोकड लंपास

सिडको : विशेष प्रतिनिधी
आडगाव पोलीस ठाण्याच्या हद्दीत घरफोडीची एक गंभीर घटना समोर आली असून, अज्ञात चोरट्यांनी तब्बल पाच लाख 44 हजार रुपयांचा मुद्देमाल चोरून नेल्याने परिसरात खळबळ उडाली आहे. या प्रकरणी पोलिसांत गुन्हा दाखल करण्यात आला असून, अधिक तपास सुरू आहे.
फिर्यादी प्रकाश दिगंबर ताजनपुरे (वय 45, रा. काव्या सदन, वेदांतनगर, भिलवाडी, नादूर गाव) हे दुपारच्या सुमारास घर बंद करून बाहेर गेले होते. त्यानंतर पुन्हा रात्री 10.30 वाजता घरी परत आल्यानंतर त्यांना घरफोडी झाल्याचे लक्षात आले. अज्ञात चोरट्यांनी घराच्या दरवाज्याचा कोयंडा तोडून प्रवेश केला.
हॉलमधील लोखंडी कपाट व देवघरातील लाकडी ड्रॉवरमधून एक मोठी व एक छोटी मणी मंगळसूत्र (24 हजार), डोरले (20 हजार), सोन्याची चेन व ओमपान (22 हजार), दोन मुलांचे अंगठे, ओमपान, बाळी व नथ (20 हजार), चांदीचे कडे व शिक्के मिळून 50 भार चांदी (20 हजार), रोख रक्कम 2 लाख 50 हजार, सोन्याची पोत (68 हजार), वेढे (60 हजार), आणखी एक चेन व ओमपान (60 हजार) असा एकूण 5 लाख 44 हजार रुपयांच्या मुद्देमालाची चोरी झाली. या चोरीचा तपास आडगाव पोलीस ठाण्याचे वरिष्ठ पोलीस निरीक्षक खैरनार यांच्या मार्गदर्शनाखाली पोलीस हवालदार राजुळे पुढील तपास करत आहेत.