पंधरा लाखांचा मुद्देमाल जप्त, नाशिकरोडला कारवाई
नाशिकरोड : विशेष प्रतिनिधी
नाशिक शहरात बेकायदेशीर गोवंश वाहतुकीच्या वाढत्या घटनांना आळा घालण्यासाठी नाशिक पोलिसांनी कंबर कसली आहे. नाशिकरोड पोलीस ठाण्याच्या हद्दीत विशेष मोहीम राबवून मोठी कारवाई केली आहे. या मोहिमेंंतर्गत 15 गायी, आठ बैलांची सुटका करत सहा पिकअप जप्त करण्यात आले. सुमारे 15 लाख 85 हजारांचा मुद्देमाल हस्तगत करण्यात आला आहे.
गेल्या 22 मेपासून सुरू करण्यात आलेल्या या मोहिमेत नाशिक-पुणे महामार्गावरील शिंदेगाव टोलनाका येथे नाकाबंदी करण्यात आली होती. गुप्त माहिती व नागरिकांच्या तक्रारीच्या आधारे ही कारवाई करण्यात आली. बेकायदेशीर पशू वाहतूक करणार्‍या आरोपींविरुद्ध भारतीय न्यायसंहिता व पशुधन संरक्षण कायद्यानुसार गुन्हे दाखल करण्यात आले आहेत.
या प्रकरणात आढळलेले प्रमुख दोष म्हणजे पशुधन वाहतुकीसाठी आवश्यक असलेल्या अधिकृत परवानग्यांचा अभाव, तसेच गायी-बैलांची अयोग्य व अमानुष पद्धतीने वाहतूक. जप्त करण्यात आलेले पशुधन सुरक्षित गोशाळेत हलविण्यात आले. या प्रकरणाचा तपास सुरू आहे. पोलीस आयुक्त संदीप कर्णिक, उपायुक्त मोनिका राऊत, सहायक पोलीस आयुक्त डॉ. सचिन बारी, वरिष्ठ पोलीस निरीक्षक अशोक गिरी, पोलीस निरीक्षक बडेसाब नाईकवाडे यांच्या मार्गदर्शनाखाली सहायक पोलीस निरीक्षक प्रवीण सूर्यवंशी, पोलीस उपनिरीक्षक संदीप पवार, राहुल काकडे, गणेश हिरे, अविनाश देवरे, विजय टेमगर, विष्णू गोसावी, अनिल पवार, नंदकुमार भोळे, अरुण गाडेकर, अनिल मोरे, अरुण हाडस, प्रवीण बोडके, बाळकृष्ण सोनवणे, सचिन सगळे, अंबादास केदारे, नितीन भामरे, नाना पानसरे, अजय देशमुख, विशाल कुवर, समाधान वाजे, महेंद्र जाधव, सागर आडणे, रोहित शिंदे, संतोष पिंगळ, लक्ष्मण पानसरे व योगेश रानडे यांनी कामगिरी बजावली.