भांडण, आमिषातून घर सोडले; चाइल्डलाइनला सापडले!

110 मुलांना हेल्पलाइनमुळे
झाली हेल्प!

घरातून पलायन किंवा फूस लावून नेलेल्या 110 मुलांचा शोध जिल्हा महिला व बालविकास अंतर्गत चाइल्ड हेल्पलाइनद्वारे लागला आहे. सप्टेंबर 2023 ते जानेवारी 2024 या चार महिन्यांत हरविलेली 30 बालके आढळून आली. बालविवाहाची एकूण 19, तसेच बालकामगार 5, बालभिक्षेकरी 5 निवारा, पुनर्वसन, चाइल्ड मिसिंग 5, अपहरण 1, लैंगिक अत्याचार 1, समुपदेशन 7 आदी बालसंगोपन, निवारा, भावनिक आधार व मार्गदर्शन, इएसजी, वैद्यकीय मदत आदी 20 प्रकारच्या केसेसमध्ये एकूण 110 बालकांची नोंद करण्यात आली.
घरातील भांडणे, कडक शिस्तीचे वातावरण किंवा घरात सावत्र आई-वडिलांचा त्रास, स्वतंत्रता, प्रेमप्रकरण, पैशांची लालूच आदी कारणांमुळे मुले घराबाहेर पडतात. घरातून पळून आलेल्या मुलांना हेरून त्यांना भीक मागायला लावणारे काही समाजकंटक नजर ठेवून असतात. अशा मुलांचा वापर ते भीक मागण्यासाठी करतात. अथवा पेन किंवा इतर वस्तू विकायला लावून त्यावर स्वत:ची पोळी भाजून घेतात.
महिला व बालकल्याण समिती अशा मुलांची गरज पाहून त्यांच्या पुनर्वसनासाठी निर्णय घेते. रस्त्यावर किंवा रेल्वे स्टेशन येथे बालके आढळली तर त्यांची वैद्यकीय तपासणी करून त्यांना बालकल्याण समितीसमोर घेऊन जातात. तात्पुरत्या निवार्‍याची सोय केली जाते. पालकांचा शोध लागल्यास त्यांच्या ताब्यात दिले जाते. पालकांचा शोध लागेपर्यंत ही बालके संस्थेत दाखल करून घेतात.
त्याशिवाय, पालक मुलांना सांभाळण्यास सक्षम असतील तर ताब्यात दिले जाते. अथवा त्यांची बालगृृहात व्यवस्था केली जाते. पालकांचा शोध न लागल्यास तिथेच त्यांचे शिक्षण आणि इतर सेवा दिल्या जातात. नाशिकमध्ये अशा प्रकारची बालगृहे उपलब्ध आहेत.