नाशिक प्रांताचे मुख्य धर्मगुरू बिशप बार्थोल बरेटो यांनी दिला नाताळचा शुभसंदेश
नाशिकरोड : विशेष प्रतिनिधी
ख्रिस्ती बांधवांचा सर्वांत मोठा सण असणारासण नाशिकरोडसह परिसरात उत्साहात आणि पारंपरिक जल्लोषात साजरा केला. उत्तर महाराष्ट्रातील सर्वांत मोठे चर्च असलेल्या जेलरोड येथील संत अण्णा महाचर्चमध्ये ख्रिस्ती बांधवांनी विश्वशांतीसाठी मध्यरात्री विशेष प्रार्थना केली. नाशिक प्रांताचे मुख्य धर्मगुरू बिशप बार्थोल बरेटो यांनी यावेळी नाताळचा शुभसंदेश दिला. प्रमुख धर्मगुरू फादर गिल्बर्ट डिनीस, सहाय्यक धर्मगुरू फादर प्रमोद मकासरे आदी मान्यवर उपस्थित होते.
बिशप बरेटो म्हणाले की, देवाचा पुत्र येशू ख्रिस्त हा प्रेम, आशा, शांती घेऊन या जगात आला. ख्रिस्त जन्माचा प्रकाश जीवनातील अंधार दूर करो आणि न्याय, सत्य व शांतीच्या मार्गावर चालण्याचे बळ सर्वांना देवो. गरीबांप्रति संवेदनशीलता, गरजूंसाठी करुणा आणि सर्वांसाठी बंधुता यांची जाणीव आपल्या सर्वांच्या हृदयात नव्याने होवो. प्रत्येक व्यक्ती देवाच्या कृपेने सुरक्षित व समृद्ध होवो.
नाताळच्या पूर्वसंध्येला नाताळ गीते, पवित्र मिसा झाली. नाताळच्या दिवशी (दि.25) सकाळी आठला फादर गिल्बर्ट डिनीस, फादर प्रमोद मकासरे यांच्या उपस्थितीत पवित्र मिसा झाली. 26 डिसेंबरला सांस्कृतिक कार्यक्रम, गायन स्पर्धा होतील. 27 डिसेंबरला सकाळी दहाला आजारी व ज्येष्ठ नागरिकांना घरी जाऊन चर्चमध्ये आणण्यात येईल. त्यांच्यासाठी प्रार्थना व सांस्कृतिक कार्यक्रम होतील. 27 रोजी ख्रिसमस देखाव्याची स्पर्धा होईल. विद्युत रोषणाईमुळे संत अण्णा महाचर्च व अन्य चर्च सजली आहेत. बाळ येशूंच्या जन्माची वार्ता चर्चमधील बारा प्रतिनिधींनी ख्रिस्ती बांधवांच्या घरी जाऊन दिली. चर्चच्या भजनी मंडळाने घरोघरी जाऊन ख्रिस्त जन्माची गाणी सादर केली. नाशिकरोड परिसरात ख्रिस्ती बांधवांमध्ये अलोट उत्साह होता. घरांवर आकाशकंदील लावण्यात आले आहेत. चर्चमध्ये रोषणाई व सजावट करण्यात आली आहे. इंग्रजी शाळांमध्ये ख्रिस्त जन्माचे देखावे करण्यात आले आहेत. नाशिकरोडचे सेंट झेवियर्स चर्च, बाळ येशू मंदिर, संत फिलिप चर्च तसेच देवळाली कॅम्प येथील गॅरिस चर्च आदी चर्चमध्येही विविध कार्यक्रमांना प्रारंभ झाला. संपूर्ण कॅथोलिक ख्रिस्तसभा प्रभू येशू ख्रिस्तांचे जयंती वर्ष 2025 हे (ज्युबिली वर्ष) साजरे करीत आहे. आशेचे यात्रेकरू ही त्याची मध्यवर्ती कल्पना आहे. समाजातील दुःखी, शोषित, पीडित लोक बरे व्हावेत, विश्वाचे कल्याण व्हावे, यासाठी चर्चमध्ये विशेष प्रार्थना केली
जात आहे.
Christian brothers celebrate Christmas with enthusiasm