नाशिक : प्रतिनिधी
सिटी लिंकच्या धडकेने जखमी झालेल्या एका वृद्धाचा उपचार सुरू असताना मृत्यू झाला. दोनच दिवसांपूर्वी सिडको भागातही एका युवतीला सिटी लिंक बसने धडक दिल्याने ती जखमी झाली होती. सिटी लिंक बसचे चालक सुसाट बस चालवितात. नियमांचे पालन करीत नाहीत, त्यामुळे अपघाताचे प्रमाण वाढले आहे.
बुधवारी सायंकाळी साडेसहाच्या सुमारास हरिश कानडे (54) हे कामावरुन घरी परतत असताना त्यांना पंचवटीतील काट्या मारुती चौकात बसने धडक दिल्याने ते जबर जखमी झाले होते. त्यांना उपचारासाठी रुग्णालयात दाखल केले होते. मात्र, उपचार सुरू असतानाच आज त्यांचा मृत्यू झाला. याअपघाताबद्दल सारंग कानडे यांच्या फिर्यादीवरुन बसचालकाविरुद्ध गुन्हा दाखल करण्यात आला आहे.
सिटी लिंक बसच्या चालकांना कोणत्याच प्रकारचे प्रशिक्षण दिलेले नाही. सुसाट वेगाने बस चालवितात. गर्दीतूनही चालताना वेग कमी करीत नाही. त्यामुळे असे अपघात वारंवार होत असतात.