घरातील हुकाला पती-पत्नीने घेतला गळफास
सिन्नर ः प्रतिनिधी
शहरातील एस. टी. कॉलनी परिसरात राहणार्‍या पती-पत्नीने राहत्या घरात गळफास घेऊन आत्महत्या केल्याची घटना सोमवारी (दि.23) रात्रीच्यावेळी घडली. रोहिदास रामा शिंपी (55) व शोभा रोहिदास शिंपी (55) असे मृत पती-पत्नीचे नाव आहे. शिंपी दांम्पत्याने आपल्या राहत्या घरामध्ये भिंतीच्या हुकास दोरीच्या साहाय्याने गळफास घेऊन आपली जीवनयात्रा संपवली. याप्रकरणी रामलाल सरवण सैनी (30) रा. उद्योग भवन यांनी सिन्नर पोलिस ठाण्यात माहिती दिल्यानंतर पोलिसांनी घटनास्थळी येत पाहणी केली. दोघांवर ग्रामीण रुग्णालयात शवविच्छेदन करुन रात्री उशिरा मृतदेह नातेवाईंच्या ताब्यात देण्यात आला. आर्थिक विंवचनेतून दोघांनी आत्महत्या केल्याचे कारण समोर येत असून त्यांच्या आत्महत्येने परिसरातून हळहळ व्यक्त होत आहे.