वृक्षाची अवैध वाहतूक करणारा पुष्पा गजाआड

नाशिक : प्रतिनिधी
अवैध वृक्षांची कत्तल करुन वाहतूक करणार्‍या ट्रकचालकाला वन विभागाने काल रंगेहाथ पकडले. त्याच्याकडून ट्रकमधील तब्बल 26 टन लाकूड ताब्यात घेतले. इगतपुरी तालुक्यात गेल्या काही महिन्यांपासून अवैधपणे वृक्षांची कत्तल सुरू होती. त्यामुळे वनविभागाचे पथक मागावरच होते. या भागातून वृक्षाची कत्तल करुन अवैध वाहतूक केली जात होती. अशी माहिती वनविभागाला मिळताच या भागात सापळा रचण्यात आला. इगतपुरी वनपरिक्षेत्र हद्दीत असलेल्या वासाळी फाटा येथे ट्रक एमएच 12 एचडी %856 हा सिन्नरच्या दिशेने जात असताना अडविण्यात आले. ट्रकचालकाकडे परवान्याची मागणी केली. मात्र परवाना नसल्याने वनविभागाचा संशय खरा ठरला. वनविभागाने ट्रक उघडून पाहिले असता त्यात आंबा, जांभूळ, सादडा या जातीचे अवैध रित्या तोडलेले वृक्ष गच्च भरलेले आढळून आले.  या ट्रकमध्ये अंदाजे 26 टन तोडलेल्या वृक्षाचे लाकूड असल्याचे वनविभागाच्या अधिकार्‍यांनी सांगितले. वनपरिक्षेत्र अधिकारी केतन बिरारी यांच्या मार्गदर्शनाखाली वनकर्मचार्‍यांच्या पथकाने ही कारवाई केली.