सदगुरुनगर परिसरात गुंडांकडून कोयते नाचवत दहशतीचा प्रयत्न

सदगुरुनगर परिसरात गुंडांकडून कोयते नाचवत दहशतीचा प्रयत्न

इमारतीतील काचा फोडून रहिवाशांना शिवीगाळ

सातपूर : प्रतिनिधी

सद‌गुरूनगर परिसरात शनिवारी रात्री १०.१५ च्या सुमारास गुंडांनी हातात कोयता नाचवत गोंधळ घातला. सद्गुरू नगर या भागातील काठे अपार्टमेंट या इमारतीवर तसेच एका दुकानावर दगडफेक केली. यात या इमारतीतील घरांच्या काचा फुटल्या. जुन्या वादातून एका युवकाला मारहाण करण्यासाठी हे गुंड आले होते. मात्र हा युवक न मिळाल्याने या गुंडांनी परिसरात दहशत निर्माण करण्यासाठी दगडफेक केली.
दरम्यान,ही माहिती कळताच पोलिसांनी धाव घेत तपास सुरु केला, रात्री उशिरापर्यंत याबाबत गुन्हा नोंदविण्याचे काम सुरू होते.
पोलिसांनी दिलेल्या माहितीनुसार जुन्या वादाची कुरापत काढत हे गुंड समीर सय्यद नामक युवकास मारण्यासाठी दुचाकीने संत कबीरनगर परिसरात गेले होते. तिथे हा युवक न मिळाल्याने त्याचा मित्र आव्हाड (रा. सद्‌गुरूनगर) याला शोधत ते सद्‌गुरूनगरात आले. मात्र तोही न मिळाल्याने या गुंडांनी हातातील कोयते नाचवले तसेच परिसरातील घरांवर दगडफेक केली. दुचाकीवरून जाताना रात्री शतपावली करणाऱ्या येथील रहिवाशांनाही कोयता दाखवत शिवीगाळ केली. या घटनेचे सीसीटीव्ही फुटेज मिळवत सातपूर पोलिस तपास करत आहेत.
दरम्यान, या घटनेची माहिती कळाल्याने आमदार सीमाताई हिरे यांनी देखील सद्गुरूनगर येथील काठे निवास इमारत याठिकाणी भयभीत झालेल्या स्थानिक महिलांना भेट देऊन पाहणी केली…