मालेगाव महापालिकेत इस्लाम पक्ष, शिंदे गटाची मुसंडी

‘इस्लाम’ला 35, तर शिवसेनेला 18 जागांवर विजय; भाजपला केवळ दोन जागा

मालेगाव : प्रतिनिधी
मालेगाव महापालिकेच्या निवडणुकीत इस्लाम पक्ष आणि शिवसेना शिंदे गटाने दणदणीत विजय मिळवत शहराच्या राजकारणाची दिशा बदलली आहे. इस्लाम पक्षाने सर्वाधिक 35 जागांवर विजय मिळवला असून, शिवसेना शिंदे गटाने 24 पैकी 18 जागा जिंकत जोरदार मुसंडी मारली आहे. ‘एमआयएम’ला यावेळी पीछेहाट सहन करावी लागली असून, त्यांना केवळ 21 जागांवर समाधान मानावे लागले. भाजपला मोठा फटका बसला असून, 26 उमेदवारांपैकी तब्बल 24 जणांचा पराभव झाला आहे. समाजवादी पार्टीला 5, तर काँग्रेसला केवळ 3 जागा मिळाल्या आहेत.

महापालिकेच्या 84 पैकी 83 जागांसाठी गुरुवारी मतदान झाले होते. यावेळी मालेगावमध्ये मतदानाचा टक्का वाढून 64.08 इतका नोंदवला गेला. 2017 च्या निवडणुकीत हा टक्का 59.84 इतका होता. एक जागा बिनविरोध झाली होती. 83 जागांसाठी शुक्रवारी सकाळी चार ठिकाणी मतमोजणी सुरू झाली. सायंकाळपर्यंत सर्व 84 जागांचे निकाल जाहीर झाले. मतमोजणीदरम्यान अनेक धक्कादायक निकाल समोर आले.
भाजपच्या दिग्गज नेत्यांना या निवडणुकीत मोठा धक्का बसला. भाजपचे माजी गटनेते सुनील गायकवाड आणि महानगरप्रमुख देवा पाटील यांचा पराभव झाला. सलग चार वेळा नगरसेवक राहिलेले गायकवाड यांना शिवसेना शिंदे गटाच्या नवख्या विशाल पवार यांनी पराभूत केले. गायकवाड यांचे पुत्र दीपक यांनाही पराभव पत्करावा लागला. मात्र, त्यांचे बंधू मदन गायकवाड यांनी दणदणीत विजय मिळवला असून, त्यांनी युवासेनेचे जिल्हाप्रमुख विनोद वाघ यांना पराभूत केले. भाजपचे प्रवीण पाटील विजयी झाले, त्यांनी शिंदे गटाचे दिलीप बच्छाव यांचा पराभव केला. राष्ट्रवादी काँग्रेस शरद पवार गटाचे युवानेते दिनेश ठाकरे यांनी ऐनवेळी शिंदे गटात प्रवेश करून उमेदवारी मिळवली आणि भाजपचे देवा पाटील यांना पराभूत करत सर्वांना धक्का दिला.
या निवडणुकीत इस्लाम पक्षाची गाडी सुसाट सुटली. पक्षाने अपेक्षेपेक्षा अधिक यश मिळवत तब्बल 35 जागा जिंकल्या. माजी आमदार आसिफ शेख यांच्या मातोश्री व माजी महापौर ताहेरा शेख, काका जलील शेख यांच्यासह पक्षाचे अनेक प्रमुख नेते विजयी झाले. पक्षाने एकूण 47 जागा लढवल्या होत्या. त्याउलट ‘एमआयएम’ने 60 जागा लढवून केवळ 21 जागांवरच विजय मिळवू शकला. काँग्रेसला 19 पैकी केवळ 3 जागा मिळाल्या. काँग्रेसचे महानगरप्रमुख एजाज बेग विजयी झाले आहेत. समाजवादी पार्टीने 19 पैकी 5 जागांवर यश मिळवले. दिवंगत समाजवादी नेते निहाल अहमद यांची कन्या शान-ए-हिंद आणि त्यांचे पती मुस्तकिम डिग्निटी हेही विजयी झाले. ‘एमआयएम’चे माजी महापौर अब्दुल मलिक दोन ठिकाणी उभे होते. त्यापैकी एका जागेवर त्यांचा पराभव झाला, तर दुसर्‍या जागेवर ते विजयी झाले.
शिवसेना शिंदे गटाने या निवडणुकीत चांगलेच यश संपादन केले आहे. गटातर्फे 24 जागा लढविण्यात आल्या होत्या. त्यापैकी 18 जागांवर यश मिळाले आहे. माजी उपमहापौर नीलेश आहेर व नरेंद्र सोनवणे हे दोघेही विजयी झाले आहेत. माजी महापौर सखाराम घोडके यांच्या पत्नी लताबाई घोडके याही विजयी झाल्या आहेत. राष्ट्रवादी काँग्रेस अजित पवार गट, शरद पवार गट, शिवसेना उबाठा, वंचित आघाडी, आप, बसपा या पक्षांना या निवडणुकीत एकही जागा मिळवता आली नाही.
इस्लाम पक्ष आणि समाजवादी पार्टीने ‘सेक्युलर फ्रंट’ नावाने आघाडी केली होती. या आघाडीला एकूण 40 जागांवर विजय मिळाला आहे. महापालिकेत सत्ता स्थापन करण्यासाठी आवश्यक असलेल्या बहुमताच्या जादुई आकड्यापर्यंत पोहोचण्यासाठी या आघाडीला आता केवळ तीन जागांची गरज आहे. निकाल जाहीर होताच शहरात विविध ठिकाणी विजयी उमेदवारांच्या समर्थकांनी गुलालाची उधळण करत, फटाके फोडत आणि जल्लोष करत आनंद साजरा केला.

निवडणूक ठळक मुद्दे

♦ 84 पैकी 83 जागांसाठी मतदान
♦ मतदान टक्का 64.08 टक्के
♦ 2017 मध्ये मतदान 59.84 टक्के
♦ एक जागा बिनविरोध
♦ 301 उमेदवार रिंगणात
♦ चार ठिकाणी मतमोजणी
♦ अनेक धक्कादायक निकाल
♦ सेक्युलर फ्रंटला 40 जागा, बहुमतासाठी 3 जागांची गरज