नाशिक : प्रतिनिधी
शहरात अखेर गोवर या संसर्गजन्य आजाराचा शिरकाव झाला आहे. एक-दोन दिवसांपूवी शहरात गोवरचे रुग्ण नसल्याचा दावा पालिकेच्या आरोग्य विभागाकडून केला जात असताना, शहरात अचानक गोवरचे चार संशयित बालकांचे नमुने तपासणीसाठी मुंबईला पाठवण्यात आल्याने आरोग्य विभागाची धाकधूक वाढली आहे.
सध्या मुंबई आणि मालेगाव शहरात गोवरची लागण लहान मुलांमध्ये मोठ्या प्रमाणात होत आहे. विषाणूपासून होणारा हा संसर्ग खोकला किंवा शिंकण्यातून होतो. नाशिक महानगरपालिकेच्या आरोग्य विभागाकडून या आजाराबाबत जनजागृती करण्यात येत आहे. मुलांमध्ये काही लक्षणे आढळल्यास पालकांनी घाबरून जाऊ नये, या आजाराची संपूर्ण माहिती डॉक्टरांना द्यावी, शहरी प्राथमिक आरोग्य केंद्रास भेट देऊन उपचार करून घ्यावेत, असे आवाहन मनपाच्या आरोग्य विभागाने गेल्या आठवड्यात केले होते. आरोग्य विभागाने केवळ आवाहनच करत आहे का, असा सवाल उपस्थित केला जातोय. दरम्यान, गोवरची बाधा कोणत्याही वयोगटात होण्याची शक्यता असते. गोवर झालेल्या व्यक्तीकडून हा आजार अंगावर लाल पुरळ येण्याच्या तीन दिवस आधी आणि चार ते सहा दिवसांनंतर दुसर्‍या व्यक्तीकडे संक्रमित होतो. गोवर झालेल्या रुग्णामध्ये अ जीवनसत्त्वाचे प्रमाण कमी होते. त्यामुळे अंधत्व येऊ शकते. गोवरसोबत होणारा न्यूमोनिया हा बर्‍याच वेळा तीव्र स्वरूपाचा असतो. यामध्ये रुग्णाच्या श्‍वसनलिकेला सूज येऊन रुग्णांना श्‍वसन प्रक्रियेत त्रास होण्याची शक्यता असते.
कुपोषित बालकांत सर्वाधिक प्रमाण
कुपोषित बालकांमध्ये या आजाराचे प्रमाण जास्त आढळते. गोवर झालेल्या रुग्णांमध्ये तीव्र ताप, शरीरावर लाल पुरळ, सर्दी, खोकला, डोळे लाल होणे अशी लक्षणे दिसतात. या आजाराचे निदान झाल्यास त्या मुलांना शाळेत पाठवू नये. कारण हा आजार वेगाने प्रसार करणारा आहे. वेगळ्या खोलीत ठेवावे. भरपूर विश्रांती घ्यायला लावणे. बहुतांशवेळा मुले लहान असल्याने एकट्याला खोलीत ठेवणे शक्य नसते. प्रौढांना या आजाराचा फारसा धोका नसतो. आजारी मुलांना मात्र इतर मुलांबरोबर मिसळू देऊ नये. बालकांना वरीलप्रमाणे काही लक्षणे आढळल्यास नागरिकांनी घाबरून जाण्याचे कारण नाही. आपल्या घराजवळच्या शहरी प्राथमिक आरोग्य केंद्रात जाऊन लक्षणाबाबत माहिती देऊन उपचार करून घ्यावेत, असे आवाहन पालिकेच्या आरोग्य विभागाने केले आहे.