नाशिक : प्रतिनिधी
महाराष्ट्र पोलिस अकादमीतील प्रशिक्षणार्थी पोलीस उपनिरीक्षकांच्या 119 व्या सत्राचा दीक्षांत संचलन, गुन्हे अन्वेषण प्रशिक्षण विद्यालयाच्या नवीन इमारतीचे उद्घाटन व मातोश्री मुलींचे वसतिगृह लोकार्पण सोहळा अशा विविध शासकीय कार्यक्रमांचे आयोजन करण्यात आले आहे. मुख्यमंत्री उद्धव ठाकरे ऑनलाईन तर उपमुख्यमंत्री अजित पवार व पालकमंत्री छगन भुजबळ यांच्यासह मान्यवर प्रत्यक्ष उपस्थित राहणार आहेत.
महाराष्ट्र पोलीस अकादमीतील प्रशिक्षणार्थी पोलीस उपनिरीक्षकांच्या 119 व्या सत्राचा दीक्षांत संचालनाचा कार्यक्रम आज सकाळी 8 वाजता पोलीस अकादमीतील मुख्य कवायत मैदान येथे होणार आहे. या कार्यक्रमांसाठी मुख्यमंत्री उद्धव ठाकरे, उपमुख्यमंत्री अजित पवार, अन्न, नागरी पुरवठा व ग्राहक संरक्षण मंत्री तथा पालकमंत्री छगन भुजबळ, गृहमंत्री दिलीप वळसे-पाटील, गृह राज्यमंत्री शहरे सतेज पाटील, गृह राज्यमंत्री ग्रामीण शंभुराज देसाई आदी मान्यवर उपस्थित राहणार आहेत.
गुन्हे अन्वेषण प्रशिक्षण इमारतीचे उद्घाटन
तसेच यानंतर सकाळी 9:45 वाजता गुन्हे अन्वयेषण प्रशिक्षण विद्यालयाच्या नवीन इमारतीचे उद्घाटनाचा कार्यक्रम संपन्न होणार आहे. या कार्यक्रमांसाठी मुख्यमंत्री उद्धव ठाकरे, उपमुख्यमंत्री अजित पवार, अन्न, नागरी पुरवठा व ग्राहक संरक्षण मंत्री तथा जिल्ह्याचे पालकमंत्री छगन भुजबळ, गृहमंत्री दिलीप वळसे-पाटील, गृह राज्यमंत्री शहरे सतेज पाटील, गृह राज्यमंत्री ग्रामीण शंभुराज देसाई, पोलीस महासंचालक रजनीश सेठ, अपर पोलीस महासंचालक (प्रशिक्षण व खास पथके) संजय कुमार, महाराष्ट्र पोलीस गृहनिर्माण व कल्याण महामंडळाचे सहव्यवस्थापकीय संचालिका अर्चना त्यागी, महाराष्ट्र पोलीस अकादमीचे संचालक राजेश कुमार आदी मान्यवर उपस्थित राहणार आहेत.
मातोश्री मुलींच्या वसतीगृहाचे लोकार्पण
त्यानंतर सकाळी 11:00 वाजता स्व. यशवंतराव चव्हाण जन्मशताब्दी वर्ष योजनेअंतर्गत मातोश्री मुलींच्या वसतिगृहाचा लोकार्पण सोहळा होणार आहे. या कार्यक्रमास मुख्यमंत्री उद्धव ठाकरे, उपमुख्यमंत्री अजित पवार, अन्न, नागरी पुरवठा व ग्राहक संरक्षण मंत्री तथा जिल्ह्याचे पालकमंत्री छगन भुजबळ, कृषी मंत्री दादाजी भुसे, उच्च व तंत्र शिक्षण मंत्री उदय सामंत, विधानसभा उपाध्यक्ष नरहरी झिरवाळ, नगरविकास, ऊर्जा, आदिवासी विकास, उच्च व तंत्रशिक्षण, आपत्ती व्यवस्थापन, मदत व पूनर्वसन राज्यमंत्री प्राजक्त तनपुरे तसेच जिल्ह्यातील खासदार व आमदार यांच्यासह लोकप्रतिनिधी उपस्थित राहणार आहेत.