मनपाचे पथक बदलापुरात जाणार

स्त्रीबीज तस्करी प्रकरण

नाशिक : प्रतिनिधी
बदलापूर येथे स्त्रीबीज तस्करीचे प्रकरण समोर आल्यानंतर त्याचे धागेदोरे नाशिकच्या मुंबई नाका परिसरातील मालती आयव्हीएफ सेंटरमध्ये येऊन सापडले होते. त्यानंतर नाशिक महापालिकेच्या वैद्यकीय विभागाने सदर सेंटर बंद करत सील केले होते. दरम्यान, याबाबतचा तपास करण्यासाठी मनपाचे वैद्यकीय पथक बदलापूरला रवाना होणार आहे.
दरम्यान, स्त्रीबीज तस्करीप्रकरणी डॉ. अमोल पाटील यांना आधीच ताब्यात घेण्यात आले आहे. नाशिकमधील मालती आयव्हीएफ केंद्रातून महिलांकडून स्त्रीबीज घेतल्याचा अधिकचा तपास करण्यासाठी मनपाचे पथक बदलापूर ला लवकरच जाणार आहे. यापूर्वी या सेंटरमधून 96 महिलांनी स्त्रीबीज दिल्याचे समोर आले आहे. मात्र, त्याबाबतचा सखोल तपास आरोग्य विभाग करत आहे. महापालिकेने तपासासाठी बदलापूर येथील संबंधित केंद्रातील महिलांची नावे मागवली होती. बदलापूर व नाशिक या दोन्ही ठिकाणच्या नावांमध्ये साम्य आहे का, किंवा नाशिकमधील काही महिला बदलापूर केंद्रातही गेल्या होत्या का, याची शहानिशा करण्यासाठी महापालिकेचे पथक बदलापूरला भेट देणार आहे. बदलापूर पोलिसांनी याप्रकरणी चौकशी सुरू केली आहे. नाशिक महापालिका, ठाणे महापालिका आणि पोलिसांचे संयुक्त पथक तपास करत आहे.

बदलापूर केंद्रातील महिलांची नावे आणि नाशिकच्या मालती सेंटरमधील नावे यात संबंध आहे का? याची पडताळणीसाठी नाशिक महापालिकेचे पथक लवकरच बदलापूरला जाणार आहे.
– डॉ. विजयकुमार देवकर, मुख्य आरोग्य अधिकारी, मनपा

Municipal team will go to Badlapur