येवला तालुक्यात बापाने केला मद्यपी मुलाचा खून

येवला : प्रतिनिधी
किरकोळ कारणावरुन मद्यपी मुलाचा पित्याने मुलाचे डोके दगडावर आपटून खून केल्याची घटना येवला तालुक्यातील कातरणी येथे घडली. संदीप बाळासाहेब आगवण (32) असे मयत मुलाचे नाव आहे या प्रकरणी आरोपी वडील बाळासाहेब आगवण राहणार कातरणी ता. येवला यांस पोलिसांनी अटक केली आहे. संदीप यास दारू पिण्याचे व्यसन होते. काही दिवसांपूर्वी संदीपची पत्नी त्याला सोडून निघून गेली होती. पहाटे चारच्या दरम्यान संदीप हा दारू पिऊन आला आणि वडील बाळासाहेब आगवण यांच्याशी भांडू लागला. तुम्ही माझा विवाह चांगल्या मुलीशी करून दिला नाही. यावरुन दोघांत जोरदार बाचाबाची होऊन हाणामारी झाली. वडील बाळासाहेब आगवण यांनी मुलगा संदीप यास आगवण यास उचलून डोक्यावर आपटल्याने त्याचा जागीच मृत्यू झाला. या प्रकरणी येवला तालुका पोलिस ठाण्यात आरोपी पिता बाळासाहेब आगवण यांच्या विरोधात गुन्हा दाखल करण्यात आला असून, त्यास अटक करण्यात आली आहे. या प्रकरणाचा पुढील तपास सहाय्यक पोलिस निरीक्षक एकनाथ भिसे करीत आहे.