शिवाजीनगरमध्ये २० वर्षीय तरुणाचा खून, प्रेमप्रकरण की वैयक्तिक वाद?
सिडको : दिलीपराज सोनार
गंगापूर पोलिस ठाण्याच्या हद्दीतील शिवाजीनगर परिसरात एका २० वर्षीय तरुणाचा धारदार शस्त्राने भोसकून खून करण्यात आल्याची धक्कादायक घटना घडली आहे. नसीम अकबर अली शहा (वय २०, रा. गुरुद्वारा रोड, म्हशीचा तबेला, सातपूर) असे खून झालेल्या तरुणाचे नाव असून, त्याचा मृतदेह रक्ताच्या थारोळ्यात आढळून आला.
ही घटना नेमकी कोणत्या कारणामुळे घडली, याबाबत अद्याप स्पष्टता नसली तरी प्रेमप्रकरण अथवा मुलीच्या छेडछाडीमधून ही हत्या झाली असावी, असा पोलिसांचा प्राथमिक अंदाज आहे. नसीमचा चुलता यांनी अज्ञात व्यक्तीविरोधात गंगापूर पोलिस ठाण्यात तक्रार दाखल केली आहे.
खून झाल्यानंतर नसीमला तत्काळ जिल्हा रुग्णालयात नेण्यात आले, मात्र डॉक्टरांनी त्याला मृत घोषित केले. या घटनेने परिसरात खळबळ उडाली असून नागरिकांमध्ये भीतीचे वातावरण निर्माण झाले आहे.
दरम्यान, गंगापूर पोलिसांनी गुन्हा नोंदवून तपास सुरु केला आहे. हत्येचे नेमके कारण आणि आरोपींची ओळख पटवण्यासाठी पोलिस विविध शक्यतांचा तपास घेत आहेत. या प्रकरणी लवकरच महत्त्वाचा खुलासा होण्याची शक्यता आहे.