वडिलांसोबत भाजीपाला घेण्यास गेला अन जीव गमावला
सिडको: विशेष प्रतिनिधी
गंगापूर पोलिस ठाण्याच्या हद्दीतील खुनाच्या घटनेला काही तास उलटत नाही तोच पुन्हा पंचवटी पोलीस ठाण्याच्या हद्दीत आपल्या वडिलांसोबत बुधवारच्या बाजारात भाजीपाला घेण्यासाठी गेलेल्या १९ वर्षीय युवकासोबत किरकोळ पैशांच्या वादात एका अल्पवयीन मुलाने धारदार हत्याराने वार करुन खुन केल्याची घटना पंचवटी परिसरातील गाडगे महाराज पुलाजवळ घडली आहे याबाबत पंचवटी पोलीस ठाण्यात गुन्हा दाखल करण्यात आला आहे. या प्रकरणी एका संशयितास पोलिसांनी ताब्यात घेतले असून, इतरांचा शोध सुरू आहे.
याबाबत पंचवटी पोलीसांनी दिलेल्या माहितीनुसार मयत नंदलाल उर्फ सुरज जगतकुमार दास परदेशी (वय १९ रा. सीतागुंफा रोड पंचवटी) हा बुधवारचा आठवडे बाजारात आपल्या वडीलांसोबत भाजीपाला घेण्यासाठी गाडगे महाराज पुलासमोरुन सायंकाळच्या सुमारास जात असतांना एका अज्ञात व्यक्तीसोबत किरकोळ पैशांवरून वाद झाल्यानंतर अज्ञात व्यक्तीने आपल्याजवळी धारदार हत्याराने वार करून तेथुन पसार झाला या घटनेची माहिती मिळताच पंचवटी पोलीस तात्काळ घटनास्थळी दाखल झाले त्यानंतर पंचनामा करण्यात आला दरम्यान येणाऱ्या जाणा-या लोकांनी जखमी नंदलाल ला उपचारासाठी जिल्हा शासकीय रुग्णालयात दाखल केले असता अतिरक्तश्राव झाल्याने उपचारा दरम्यान त्याला डॉक्टरांनी मयत घोषित केले. याप्रकरणी पंचवटी पोलीस ठाण्यात गुन्हा दाखल करण्यात आला असून पुढील तपास पंचवटी पोलिस ठाण्याचे वरिष्ठ पोलीस निरीक्षक मधुकर कड यांच्या मार्गदर्शनाखाली पंचवटी पोलीस करीत आहे.
नागरिक भयभीत
शहरातील दिवसेंदिवस खुनाच्या घटनेत होणारी वाढ तसेच वाढती गुन्हेगारी यामुळे नागरिक पुरते भयभीत झाले असुन मंत्र भुमी ते यंत्र भुमी अशी ओळख असलेल्या नाशिकची ती ओळख पुसुन आता गुन्हेगारांची भुमी अशी होऊ पहात आहे. भविष्यातील हा संभाव्य धोका ओळखून पोलिस प्रशासनाने वेळीच गुन्हेगारी आणि गुन्हेगारांचा बिमोड करण्याची मागणी नाशिककर नागरिकांनी केली आहे