सिन्नर न.प.कडून नागरिकांना पर्यावरण संवर्धनाचे आवाहन
सिन्नर : प्रतिनिधी
सिन्नर नगरपरिषदेने नायलॉन मांजा विक्री व वापर करणार्यांच्या विरोधात कठोर कारवाई करण्याचा इशारा दिला आहे. पर्यावरण संवर्धनाच्या दृष्टीने महत्त्वाचे मानले जाणारे माझी वसुंधरा अभियान 6.0 अंतर्गत ही मोहीम राबविण्यात येणार आहे.
संक्रांतीच्या पार्श्वभूमीवर सिन्नर शहरामध्ये मोठ्या प्रमाणात नायलॉन मांजाची विक्री आणि वापर होतो. नगरपरिषदेने याला प्रतिबंध घालण्यासाठी विशेष पथकांच्या माध्यमातून संपूर्ण शहरात तपासणी अभियान सुरू केले आहे. नायलॉन मांजाच्या वापरामुळे होणार्या जीवितहानीपासून नागरिक, पक्षी आणि प्राणी यांचे संरक्षण करण्यासाठी नगरपरिषदेकडून जनजागृती मोहीम राबवली
जात आहे. नायलॉन मांजा अथवा चायनीज मांजा अत्यंत धारदार व धोकादायक असल्याने त्याचा वापर केल्यास गंभीर अपघात होण्याची शक्यता निर्माण होते. मागील काही वर्षांमध्ये या मांजामुळे अनेक पक्ष्यांचे मृत्यू, नागरिकांचे गळे व इतर शारीरिक अवयव चिरले जाणे, दुचाकीस्वारांचे अपघात, विद्युत वाहिन्यांमध्ये अडथळा निर्माण होऊन आग लागणे किंवा पुरवठा खंडित होण्याच्या घटना घडत असतात. त्यामुळेच उच्च न्यायालयाने नायलॉन मांजाचा वापर, साठवणूक आणि विक्रीवर बंदी घातली आहे. या आदेशानुसार सिन्नर न.प.कडून कडक कारवाई करण्याचे संकेत देण्यात
आले आहेत.
सुती मांजाचा वापर करावा
पतंगोत्सवात नायलॉन मांजाचा वापर न करता सुती किंवा कापडी मांजा, पर्यावरणपूरक दोर्यांचा वापर करण्याचे आवाहन नगरपरिषदेने केले आहे. नायलॉन मांजाचा वापर अथवा चोरून विक्री होत असल्यास नागरिकांनी नगरपरिषद किंवा पोलिसांना माहिती द्यावी. आपले जीवित रक्षण आणि पर्यावरणाच्या सुरक्षिततेसाठी नायलॉन मांजाचा वापर टाळावा, असे नगरपरिषदेने प्रसिद्धीस दिलेल्या पत्रकात म्हटले आहे.
नायलॉन मांजा वापरताना आढळले तरी कारवाई
घाऊक किंवा किरकोळ विक्रेते नायलॉन मांजा विकताना आढळल्यास त्यांच्यावर कायदेशीर कारवाई करण्यात येणार आहे. एखाद्या व्यापार्यांकडे नायलॉन मांजाचा साठा आढळल्यास जप्ती व दंड ठोठावण्यात येईल. एखादा नागरिक नायलॉन मांजाने पतंग उडवत असल्यास पर्यावरण (संरक्षण) अधिनियम, 1986 अंतर्गत कडक कारवाई केली जाईल. – अभिजित कदम, मुख्याधिकारी