सिडको : विशेष प्रतिनिधी
अंबड परिसरात बस प्रवासादरम्यान एका प्रवाशाच्या बॅगेतील सुमारे एक लाख 10 हजार रुपयांचा मुद्देमाल अज्ञात चोरट्याने लंपास केल्याची घटना उघडकीस आली आहे. याप्रकरणी अंबड पोलीस ठाण्यात गुन्हा दाखल करण्यात आला आहे.
फिर्यादी रमेश बाबुलाल माळी (वय 53, रा. श्रीराम किराणा समोर, दत्तनगर, अंबड, नाशिक) यांनी पोलीस ठाण्यात दिलेल्या तक्रारीनुसार, नाशिकरोड बस स्टॉप ते कॉन्टिनेन्टल कंपनी बस स्टॉप, अंबड या सिटी बस प्रवासादरम्यान त्यांची बॅग अज्ञात चोरट्याने चोरून नेली.
या बॅगेत 50 हजारांंचा अंदाजे एक तोळे वजनाचा सोन्याचा नेकलेस, 25 हजारांची सोन्याची अंगठी (पाच ग्रॅम), 25 हजारांची सोन्याची नथ (पाच ग्रॅम) आणि दहा हजार रुपये रोख रक्कम (100 रुपयांच्या शंभर नोटा), असा एकूण अंदाजे एक लाख 10 हजार रुपयांचा मुद्देमाल होता. या घटनेनंतर तातडीने अंबड पोलिस ठाण्यात गुन्हा दाखल करण्यात आला आहे. वरिष्ठ पोलिस निरीक्षक राकेश हांडे यांच्या मार्गदर्शनाखाली हवालदार झोले तपास करत आहेत.