सिडको : विशेष प्रतिनिधी
नाशिकरोड हेड पोस्ट ऑफिस आणि जनरल पोस्ट ऑफिस (जीपीओ) येथील एटीएम मशिनमधून अज्ञात सायबर गुन्हेगाराने एकूण 14 लाख 11 हजार रुपयांची फसवणूक केल्याचा प्रकार उघडकीस आला आहे. या प्रकरणी सायबर पोलीस ठाण्यात गुन्हा दाखल करण्यात आला आहे.या प्रकरणी गजेंद्र भालचंद्र भुसाणे (57, व्यवसाय – नोकरी, नाशिकरोड पोस्ट ऑफिस) यांनी फिर्याद दिली आहे.
फिर्यादीत नमूद केल्याप्रमाणे, नाशिकरोड हेड पोस्ट ऑफिस येथील एटीएम (क्रमांक 0620) मधून अज्ञात आरोपीने 20 वेगवेगळ्या बँकांच्या कार्डांचा वापर करून 124 बनावट व्यवहारांच्या माध्यमातून 10 लाख 20 हजार रुपये काढले. त्याचप्रमाणे, जीपीओ नाशिक येथील एटीएम (क्रमांक 0609) मधून 11 बँकांच्या कार्डाद्वारे 52 बनावट व्यवहार करत 3 लाख 91 हजार रुपये काढण्यात आले.असा एकूण 176 बनावट व्यवहार करत अज्ञात आरोपीने 14 लाख 11 हजार रुपयांची रक्कम फसवणूक करून उचलली आहे.या प्रकरणी गुन्हा दाखल करण्यात आला असून पुढील तपास वपोनि सुभाष ढवळे हे करीत आहेत.