कारच्या भीषण अपघातात सहा ठार

एकजण जखमी : चालकाचा ताबा सुटून कार घरावर आदळली

कळवण : प्रतिनिधी
तालुक्यातील मानूर शिवारात कोल्हापूर फाटा येथे मंगळवारी (दि. 4) रात्री सव्वादहाच्या सुमारास कारच्या भीषण अपघातात चालकासह सहा ठार, तर एकजण गंभीर जखमी झाला. चालकाचा ताबा सुटल्याने कार रस्त्याच्या कडेला असलेल्या घरावर आदळली.
नाशिकहून कळवणकडे भरधाव जात असलेल्या हुंदाई आय 10 कारने कोल्हापूर फाट्यावरील विठोबा आहेर यांच्या बंगल्याच्या बीमला धडक दिल्याने हा भीषण अपघात झाला. अपघातात बालकासह पाच जणांचा जागीच मृत्यू झाला. मृत नामपूर (ता. बागलाण) व देवळा येथील रहिवासी आहेत. दोघांना अधिक उपचारासाठी नाशिक येथे नेत असताना उत्कर्ष योगेश मेतकर यांचा रस्त्यातच मृत्यू झाला. भालचंद्र मधुकर बधान (वय 65) गंभीर जखमी असून, त्याच्यावर नाशिक येथे उपचार सुरू आहेत. अपघातावेळी कारचा वेग प्रचंड असल्याने चालकाचा ताबा सुटला. या भीषण अपघातात गाडीच्या पुढील भागाचा चक्काचूर झाला. स्थानिक नागरिकांनी धाव घेत अपघातग्रस्तांना मदतकार्य केले. जखमींना तत्काळ रुग्णवाहिकेने उपजिल्हा रुग्णालयात दाखल केले. वैद्यकीय अधिकार्‍यांनी तपासणीनंतर चौघांना मृत घोषित केले, तर दोघांची प्रकृती चिंताजनक असल्याने त्यांना अधिक उपचारासाठी नाशिक येथे पाठविले. मात्र, गंभीर दुखापत असल्याने रस्त्यातच एकाच मृत्यू झाला. या हृदय पिळवटून टाकणार्‍या घटनेने नामपूर व देवळा शहरावर शोककळा पसरली आहे. घटनास्थळी उपविभागीय पोलीस अधिकारी किरणकुमार सूर्यवंशी यांनी भेट दिली. पोलीस निरीक्षक खगेंद्र टेम्भेकर यांच्या मार्गदर्शनाखाली सहाय्यक पोलीस निरीक्षक जगदीश बोरसे तपास करीत आहेत.

अपघातातील मृतांची नावे
माधवी योगेश मेतकर (वय 30), त्रिशा योगेश मेतकर (3), उत्कर्ष योगेश मेतकर, शैला वसंत बधान (65), प्रतीक्षा भालचंद्र बधान (50), चालक सगीरखा मेहबूबखा पठाण (वय 67, रा. नामपूर,
ता. बागलाण)