थकबाकीदाराचे नळ कनेक्शन खंडित

मालेगाव महापालिकेची वसुलीसाठी कडक कारवाई

मालेगाव : प्रतिनिधी
मालेगाव महानगरपालिकेच्या आयुक्तांच्या आदेशानुसार तसेच अतिरिक्त आयुक्त, उपायुक्त (महिला व बालकल्याण) तथा नियंत्रण अधिकारी, मुख्य निरीक्षक कर संकलन अधिकारी, सहाय्यक आयुक्त (कर) व जप्ती प्रमुख तथा प्रभाग अधिकारी यांच्या मार्गदर्शनाखाली मंगळवारी (दि. 11) प्रभाग क्रमांक 1 अंतर्गत कॅम्प भाग 2 येथील वसुली वॉर्डामध्ये थकबाकीदार मिळकतधारकांविरोधात कडक कारवाई करण्यात आली.
सदर वॉर्डातील एका घरमालकाची घरपट्टी व पाणीपट्टीची एकूण थकबाकी रक्कम रुपये 49 हजार रुपये इतकी असल्याने महानगरपालिकेच्या पथकाने त्यांचे नळकनेक्शन खंडित केले. ही कारवाई वॉर्ड लिपिक प्रदीप बच्छाव, नीलेश देवरे, जनार्दन खेरनार, वासू शिरसाट, भूपन कंदारे, चेतन शिरसाट व अमित पगारे
यांनी केली.
दरम्यान, आयुक्तांनी मालेगाव महानगरपालिका कार्यक्षेत्रातील सर्व थकबाकीदार मिळकतधारकांना आवाहन केले आहे की, नागरिकांनी अभय योजनेचा जास्तीत जास्त लाभ घ्यावा. घरपट्टी व पाणीपट्टी कराची थकबाकी एकरकमी भरून व्याज व शास्तीवर 70 टक्के सूट मिळवावी व कठोर कारवाई टाळावी, असे आवाहन आयुक्तांनी केले आहे.

The defaulter’s water connection was disconnected.