पालिकेची सदस्य संख्य पुन्हा 122 होणार ?

तर प्रभाग तीनचाच राहण्याची शक्यता

नाशिक : प्रतिनिधी

राज्य शासनाने नव्याने प्रभाग रचना करण्याच्या सूचना नाशिकसह राज्यातील पालिकांना दिल्या आहे. त्यानुसार याचाच भाग म्हणून की काय गुरुवाई (दि.24) निवडणूक आयोगाबरोबर झालेल्या व्हिडिओ कॉन्फरन्सिंग द्वारे बैठकीत महापालिका आयुक्त तथा प्रशासक डॉ. चंद्रकांत पुलकुंडवार यांनी भाग घेतला होता. यावेळी आयोगाने मतदान यादीचा घोळ होणार नाही, याची दक्षता घेण्याचे सूचना केले. दरम्यान महाविकास आघाडी सरकार असताना नाशिकमधील पालिकेतील सदस्यसंख्या 122 वरुन 133 करण्यात आली होती. मात्र आता नव्याने होणाऱ्या प्रभाग रचनेत नाशिक पालिकेतील सदस्य संख्या पुन्हा 122 होण्याची शक्यता असल्याची जोरदार चर्चा पालिका वर्तुळात आहे. परंतु प्रभागातील सदस्य संख्या ही तीन राहणार असल्याचे बोलले जात आहे. त्यामुळे नाशिकची आगामी महापालिका 3 सदस्यी नुसारच होणार असल्याची जोरदार चर्चा आहे.

याआधी प्रारूप यादी प्रसिद्ध झाल्यावर शहरातून 3 हजार 800 हरकती प्राप्त झाल्या होत्या. त्यामुळे आता अशी परिस्थिती येऊ देऊ नये अशा सूचना पालिकेला केलेल्या समजते आहे. राज्यात महाविकास आघाडी सरकार असताना नाशिक महापालिका निवडणुकीसाठी निवडणूक आयोगाच्या सूचनेनुसार महापालिका प्रशासनाने एकूण 12 लाख 372 मतदारांची अंतिम मतदार यादी प्रसिद्ध केली होती. त्यात 6 लाख 29 हजार 682 पुरुष तर 5 लाख 70 हजार 636 महिला मतदार संख्या होती. 2011 च्या जनगणनेनुसार नाशिक शहरातील लोकसंख्या सुमारे 14 लाख 85 हजार आहे तर यापूर्वी महापालिकेने महाविकास आघाडी सरकारच्या काळात 133 नगरसेवक याप्रमाणे मतदार यादी तयार केली होती, मात्र आता वाढीव केलेल्या अकरा जागा कमी होणार असल्याचे बोलले जात असून पुन्हा सदस्य संख्या ही 122 होण्याची शक्यता आहे. असे झाल्यास प्रभागातील मतदार संख्या पाच ते सहा हजारांनी वाढणार आहे. तसेच यापूर्वी असलेले 44 प्रभागांची संख्या कमी होण्याची शक्यता आहे. शासनाने यापूर्वी दिलेल्या निर्देशात फक्त वाढीव नगरसेवक संख्या कमी करण्याचे आदेश दिले होते, मात्र प्रभाग रचना तीन की चार याबाबत कोणते ही नवीन आदेश दिले नसल्यामुळे 30 सप्टेंबर 2022 च्या आदेशानुसार 3 सदस्य प्रमाणे नवीन रचना होणार असल्याचे समजते. मागील प्रभागा रचनेच्या तुलनेत यंदा प्रत्येक प्रभागात लोकसंख्या तसेच मतदार संख्या देखील वाढणार आहे. तर नगरसेवक संख्या 133 वरून कमी होऊन 122 राहणार असल्याचे समजते. दरम्यान आज दुपारी त्याचप्रमाणे मागच्या वेळेला झालेल्या त्रुटी दूर करून अद्यावत मतदार यादी तयार करण्याचे आदेश देखील दिले आहे. यासाठी महापालिका प्रशासन तसेच महसूल विभागाचे अधिकारी प्रयत्न करणार आहे.