सिडको : विशेष प्रतिनिधी
द्वारका परिसरातील तपोवन रोडवरील अनुसयानगर भागात एका वृद्ध महिलेच्या गळ्यातील सोन्याची चेन मोटारसायकलवरील दोघा अनोळखी व्यक्तींनी जबरदस्तीने खेचून चोरून नेल्याची घटना घडली आहे. या प्रकरणी भद्रकाली पोलीस ठाण्यात गुन्हा दाखल करण्यात आला आहे.
फिर्यादी अनिता सूर्यकांत जायस्वाल (वय 65, व्यवसाय – घरकाम, रा. देवदत्त रोहाऊस नं. 2, अनुसयानगर) या रात्री घराबाहेर खुर्ची टाकून बसलेल्या असताना यावेळी मोटारसायकलवर आलेल्या दोन अनोळखी व्यक्तींनी त्यांच्या गळ्यातील अंदाजे दोन तोळ्याची सुमारे 1 लाख 50 हजार रुपये किमतीची सोन्याची चेन जबरदस्तीने खेचून नेली व घटनास्थळावरून
पलायन केले.
चोरी करणारे दोघेही हिंदी भाषिक असून, मोटारसायकलवर पुढे बसलेला व्यक्ती अंदाजे 35 वर्षांचा असून, त्याने निळ्या रंगाचा शर्ट परिधान केला होता. तर मागे बसलेला व्यक्ती अंदाजे 30 वर्षांचा असून, त्याने काळ्या रंगाचा शर्ट घातलेला होता. या घटनेने परिसरात काही वेळ तणावाचे वातावरण निर्माण झाले होते. घटनेनंतर भद्रकाली पोलिसांनी घटनास्थळी भेट देऊन तपास सुरू केला असून, आरोपींचा शोध घेण्यात येत आहे. या प्रकरणाचा पुढील तपास महिला पोलीस उपनिरीक्षक सविता गवांदे करीत आहेत.