दुचाकीस्वार जखमी
सातपूर : प्रतिनिधी
पाइपलाइन रोड, रामेश्वरनगर परिसरात काल दुपारी अडीचच्या सुमारास महिंद्रा शोरूमच्या ट्रायलसाठी आलेल्या चारचाकी चालकाचे नियंत्रण सुटल्याने रस्त्यावरून जाणार्या एका दुचाकीला जोरदार धडक बसली. या अपघातात दुचाकीस्वार गंभीर जखमी झाला आहे. त्याला तातडीने खाजगी रुग्णालयात दाखल करण्यात आले.
रामेश्वरनगर परिसरात सध्या मोठ्या प्रमाणावर बांधकामे सुरू आहेत. या बांधकामांमुळे रस्त्यावर मोठ्या प्रमाणात रेती व माती पसरलेली होती. त्यातच महिंद्रा शोरूमची ट्रायल गाडी वेगात असल्याने रस्त्यावर पसरलेल्या रेतीवरून ती घसरली आणि चालकाचे नियंत्रण सुटले. परिणामी समोरून येणार्या दुचाकीला गाडीची धडक बसली. नागरिकांनी तत्काळ जखमी दुचाकीस्वाराला जवळच्या खाजगी रुग्णालयात दाखल केले. याप्रकरणी गंगापूर पोलीस ठाण्यात गुन्हा नोंदणीचे काम सुरू होते. पुढील तपास पोलीस करीत आहेत.