दादा कोंडके यांच्या वेशात अनोखे आंदोलन

वृक्षतोडीविरोधात कलाकार सरसावले

पंचवटी : प्रतिनिधी
तपोवन परिसरातील वृक्षतोडीच्या प्रस्तावाविरोधात सुरू असलेल्या ‘तपोवन बचाव आंदोलना’ला आता कला-सांस्कृतिक क्षेत्रातूनही जोरदार पाठिंबा मिळत आहे. मूळचा मखमलाबादकर असलेला सिनेअभिनेता सोनू (लखन ) अहिरे यांनी दिवंगत विनोदी अभिनेते दादा कोंडके यांच्या वेषात साकारलेले अनोखे आंदोलन नागरिकांचे विशेष लक्ष वेधून घेत आहे.
तपोवनातील झाडे वाचविण्यासाठी जनजागृती करण्याच्या उद्देशाने सोनू अहिरे याने दादा कोंडके यांच्या लोकप्रिय शैलीत संवाद, हावभाव आणि विनोदाच्या माध्यमातून वृक्षसंवर्धनाचा संदेश दिला. ‘झाडे वाचवा, तपोवन वाचवा’ हा संदेश त्यांनी प्रभावीपणे मांडत नागरिकांमध्ये पर्यावरणाबाबत जागृती निर्माण केली. या आंदोलनात दिग्दर्शक कलीम शेख, दीनानाथ शुक्ला, कार्तिक अनिल, अनया खान यांच्यासह अनेक कलाकारांनी सक्रिय सहभाग घेतला. कलाकारांनी हातात फलक, घोषणाबाजी व संवादात्मक सादरीकरणाच्या माध्यमातून वृक्षतोडीविरोधात आपला निषेध नोंदवला.
कलाकारांनी सांगितले की, तपोवन हे केवळ धार्मिक नव्हे, तर पर्यावरणीयदृष्ट्याही अतिशय संवेदनशील क्षेत्र आहे. येथे होणारी वृक्षतोड भविष्यात गंभीर परिणाम घडवू शकते. त्यामुळे प्रशासनाने वृक्षतोडीचा निर्णय तत्काळ मागे घ्यावा आणि पर्यावरणपूरक पर्यायांचा विचार करावा, अशी मागणी यावेळी करण्यात आली. या अनोख्या आंदोलनामुळे तपोवन बचावाचा प्रश्न पुन्हा एकदा चर्चेत आला आहे. सर्व स्तरांतून मोठ्या प्रमाणात वाढता पाठिंबा मिळत असल्याचे चित्र दिसत आहे.