येवल्यात बेमोसमी पावसाने गहू, कांदा पिकांचे नुकसान

येवला : प्रतिनिधी
येवला शहरासह तालुक्यातील अनेक भागात जोरदार वार्‍यासह बिगरमोसमी पावसामुळेे जनजीवन विस्कळीत झाले असून, शेतातील गहू, कांदा पिकांचे मोठ्या प्रमाणात नुकसान झाले आहे.
येवला शहरात मंगळवारी दुपारी चारच्या दरम्यान जोरदार पाऊस बरसला. अर्धातास झालेल्या पावसामुळे शहरातील रस्त्यावर पाणी साचले होते. तालुक्यातील अनेक भागात पाऊस बरसल्याने काढणीला आलेला गहू आडवा झाला असून, वार्‍यामुळे दाणे गळण्याचे प्रमाण वाढले आहे. मुख्य पीक असलेल्या कांद्याची काढणी सुरू असतानाच पाऊस झाल्याने साठवणूक केलेला आणि शेतात असलेला कांदा सडण्याची शक्यता निर्माण झाली आहे. “अचानक आलेल्या पावसामुळे उभ्या गव्हाच्या पिकाचे प्रचंड नुकसान झाले आहे. पीक जमिनीला टेकल्याने आता उत्पादनात मोठी घट होईल,“ अशी माहिती येवला-बदापूर रोडवरील शेतकरी अशोक पवार यांनी दिली. सतत निसर्गाच्या लहरीपणामुळे शेतकरी हवालदिल झाला आहे.

राज्यात अवकाळी पावसाची जोरदार हजेरी

राज्यात मागील काही दिवसांपासून थंडीत वाढ झाली आहे. यातच आता मुंबई, ठाणे आणि धुळे जिल्ह्यात काही ठिकाणी जोरदार पावसाने हजेरी लावली आहे. राज्यात झालेल्या पावसामुळे थंडी आणखी वाढण्याची शक्यता आहे. धुळे जिल्ह्यात अवकाळी पावसाने अचानक जोरदार हजेरी लावत शेतकर्‍यांच्या चिंतेत मोठी भर घातली आहे. शिंदखेडा तालुक्यातील नरडाणा परिसरात सोसाट्याच्या वार्‍यासह जोरदार पाऊस व गारपीट झाली. जवळपास अर्धा तास सुरू असलेल्या या अवकाळी पावसामुळे शेती पिकांचे मोठ्या प्रमाणात नुकसान झाल्याची प्राथमिक माहिती समोर येत आहे.

Unseasonal rains damage wheat, onion crops in Yeola