नाशिक : प्रतिनिधी
माहिती व जनसंपर्क संचालनालयाने गट अ आणि गट ब संवर्गातील अधिकार्यांच्या बदल्या केल्या असून, गेल्या सहा ते सात महिन्यांपासून रिक्त असलेल्या नाशिकच्या जिल्हा माहिती अधिकारी पदावर धुळे येथील विलास बोडके यांची पदस्थापना करण्यात आली आहे. बोडके यांनी यापूर्वीही नाशिक येथे जिल्हा माहिती अधिकारी म्हणून काम पाहिलेले आहे. निवडणुकीपूर्वी त्यांची धुळे येथे बदली झाली होती. याशिवाय, अलिबागच्या मनीषा पिंगळे यांची बदली नवी दिल्लीत महाराष्ट्र परिचय केंद्रात जनसंपर्क अधिकारी म्हणून करण्यात आली आहे. जळगावचे युवराज पाटील यांची बदली पुण्यात तर यवतमाळचे मंगेश वरकड यांची बदली वर्धा येथे, पुण्याचे रवींद्र ठाकूर यांची बदली जळगावला आणि डहाणूच्या शैलजा पाटील यांची बदली मुंबईत करण्यात आली आहे.