मंत्री भुजबळ : येवल्यातील पूरग्रस्त भागाची पाहणी
येवला ः प्रतिनिधी
येवल्यासह नाशिक जिल्ह्यात गेल्या 24 तासांत 100 मिलिमीटरहून अधिक पावसाची नोंद झाली. अनेक ठिकाणच्या लोकांना स्थलांतरित करण्याचे काम सुरू आहे. मात्र, पूरग्रस्त भागातील नागरिक, पशूंचे जीव वाचविण्यासाठी प्रशासनाकडून प्रथम प्राधान्य आहे, अशी माहिती राज्याचे अन्न, नागरी पुरवठा व ग्राहक संरक्षणमंत्री छगन भुजबळ यांनी दिली.
गेल्या 24 तासांत जिल्ह्यात ढगफुटीसदृश पाऊस झाल्याने अनेक ठिकाणी पूरस्थिती निर्माण झाली. मंत्री भुजबळ यांनी येवला मतदारसंघातील पूरग्रस्त भागाची अधिकार्‍यांसमवेत पाहणी करत तातडीने मदतकार्य उपलब्ध करून दिले. गेल्या 24 तासांत 100 मिलिमीटरपेक्षा अधिक अतिवृष्टी झाल्याने पूरस्थिती निर्माण झाली आहे. आपत्तीग्रस्त कुटुंबांना दहा किलो गहू व दहा किलो तांदूळ, तसेच ज्याला गहू नको असतील त्याला तेवढेच तांदूळ वाटप करण्याचे निर्देश दिले. याबरोबरच प्रतिकुटुंब तीन किलो डाळ उपलब्ध करून देण्याच्या सूचना दिल्या आहेत. आपत्तीग्रस्तांना सुरक्षितस्थळी हलवून निवारा उपलब्ध करून देण्याच्या सूचना दिल्याची माहिती मंत्री भुजबळ यांनी दिली.
यावेळी प्रांताधिकारी बाबासाहेब गाढवे, तहसीलदार विशाल नाईकवाडे, प्रभारी तहसीलदार पंकज नेवसे, कृषी अधिकारी शुभम बेरड, तालुका पोलीस निरीक्षक संदीप मंडलिक, येवला शहर पोलीस निरीक्षक अनिल भवारी, लासलगाव पोलीस स्टेशनचे सहायक पोलीस निरीक्षक भास्कर शिंदे, ज्येष्ठ नेते अंबादास बनकर, प्रदेश सरचिटणीस दिलीप खैरे, जिल्हा परिषद माजी अध्यक्ष राधाकिसन सोनवणे, युवानेते मकरंद सोनवणे, माजी सभापती देवीदास निकम, वसंत पवार, दत्ता निकम, संतोष खैरनार, युवानेते भूषण लाघवे, भाऊसाहेब धनवटे, पांडुरंग राऊत, ज्येष्ठ नेते रावसाहेब आहेर, गणपत कांदळकर, सुनील पैठणकर, सचिन सोनवणे, माधव जगताप, अमोल एंडाईत, अनिल सोनवणे, नितीन जाधव, चंद्रकांत सांबरे, विशाल परदेशी, दत्ता थोरात, भूषण लाघवे, प्रकाश बागल, योगेश खैरनार, नवनाथ थोरात, पार्थ कासार, सौरभ जगताप, किरण दाभाडे, बापूशेठ दाभाडे, भाऊसाहेब कदम, नवनाथ दाभाडे, भाऊसाहेब मंडलिक, अरुण मोरे, पंचम साळवे, नवनाथ पोळ यांसह पदाधिकारी व कार्यकर्ते उपस्थित होते.
अंदरसूल येथे कोळगंगा नदीचे पाणी नागरी वस्तीत शिरल्याने अनेक घरांत पाणी शिरून नुकसान झाले. या भागात मंत्री भुजबळ यांनी प्रत्यक्ष पाण्यात उतरून पाहणी केली. त्यानंतर येवला शहरातील हुडको कॉलनीत घरांत पाणी शिरले. तेथेही पाहणी केली. सावरगाव परिसराची पाहणी करत पाटोदा शहरातील शॉपिंग सेंटर भागातील पूरग्रस्त भागाची त्यांनी पाहणी केली. निफाड तालुक्यातील पाचोरा, मरळगोई, लासलगाव, टाकळी, विंचूर येथे नुकसानग्रस्त भागाची पाहणी करत मदत करण्याच्या सूचना संबंधित अधिकार्‍यांना दिल्या.