वाडीवर्हेची घटना; मद्यपी पतीला अटक
इगतपुरी : प्रतिनिधी
दारू पिण्यासाठी 50 रुपये दिले नाही म्हणून राग आल्याने मद्यपी पतीने लोखंडी रॉड पत्नीच्या डोक्यात मारून निर्घृण खून केल्याची घटना इगतपुरी तालुक्यातील वाडीवर्हे परिसरातील सांबरवाडी (गणेशवाडी ) येथे घडली. याबाबत वाडीवर्हे पोलीस ठाण्यात मयताचा मुलगा राकेश मोरे याने फिर्याद दिली आहे.या घटनेबाबत वाडीवर्हे पोलीस ठाण्यात खुनाचा गुन्हा दाखल करण्यात आला आहे. मद्यपी पतीला पोलिसांनी अटक केली आहे. घटनेचे गांभीर्य पाहुन उपविभागीय पोलीस अधिकारी डॉ. अर्जुन भोसले यांनीही घटनास्थळी भेट देत तपास कामी सूचना केल्या.
वाडीवर्हे परिसरामध्ये असलेली सांबरवाडी ( गणेशवाडी) येथील लालू सोपान मोरे पत्नी, मुलगा व सून यांच्या सोबत राहतो. त्यांचा मुलगा राकेश सोपान मोरे, वय 23 वर्ष हा मासे विक्रीचा व्यवसाय करतो. लालू सोपान मोरे हा दारू पिऊन रात्री घरी आला होता. मीराबाई (45) हिच्याकडे तो 50 रुपये दारू पिण्यासाठी मागत होता. मात्र तिने नकार देताच त्याने शिवीगाळ करण्यास सुरुवात केली.काही वेळानंतर तो घरातून निघून गेला. सर्व जणांनी जेवण केले. मुलगा राकेश व सून बाहेर पडवीत झोपण्यासाठी गेले असता मिराबाई घरात एकटीच झोपली होती.त्यानंतर रात्री साडेनऊ ते दहाच्या दरम्यान लालू सोपान मोरे घरी आल्यानंतर दरवाजा लावून घेतला. पैसे न दिल्याचा राग मनात धरून मिराबाईला मारहाण करू लागला. लोखंडी रॉडने लालू मोरे याने तिच्या डोक्यावर, तोंडावर जोरदार प्रहार केले. यामुळे ती रक्ताच्या थारोळ्यात पडली. गोंगाट ऐकून मुलगा व सून दरवाजा वाजवू लागले.काही वेळाने लालू याने स्वतःच दरवाजा उघडून मुलाला म्हणाला की मी तुझ्या आईला मारून टाकले आहे. तुला काय करायचे ते कर. राकेश याने वेळ न दवडता 108 नंबरला कॉल करून रुग्णवाहीका बोलावून घेतली. रुग्णवाहिकेतील वैद्यकीय अधिकार्यांनी तपासून मीराबाई हिला मृत घोषित केले. याबाबत त्यांनी तात्काळ वाडीवर्हे पोलिसांशी संपर्क साधला. पोलिसांनी घटनास्थळी धाव घेऊन संशयित आरोपीस ताब्यात घेतले. अधिक तपास वाडीवर्हे पोलीस ठाण्याचे पोलीस निरीक्षक बिपिन शेवाळे यांच्या मार्गदर्शनाखाली वाडीवर्हे पोलीस करत आहेत.