सिन्नर : प्रतिनिधी
स्वत:ला ज्वलनशील पदार्थाने पेटवून घेत पत्नी आणि सासूला मिठी मारून त्यांना जीवे मारण्याचा प्रयत्न तालुक्यातील सोनारी येथे जावयाने केला होता. या घटनेत पहिल्याच दिवशी जावयाचा मृत्यू झाला होता, त्यानंतर आठवडाभरात सासूचाही मृत्यू झाला होता. त्यानंतर भाजल्याने नाशिक येथे उपचार सुरू असलेल्या पत्नीचाही दोन दिवसांपूर्वी मृत्यू झाला आहे. स्नेहल केदारनाथ हांडोरे (19, रा. शिंदेवाडी) असे मयत महिलेचे नाव आहे.
सोनारी येथील जळीत प्रकरणी तिघांचाही दुर्दैवी अंत झाल्याने हळहळ व्यक्त केली जात आहे. केदारनाथ दशरथ हांडोरे (24) रा. शिंदेवाडी, ता. सिन्नर याने पत्नी स्नेहल (19) माहेरी राहण्यासाठी आल्यानंतर सोनारी येथे जाऊन वाद घातला. चाकूचा धाक दाखवून मित्रांच्या मदतीने पळवून नेण्याचा प्रयत्नही केला होता.
यात त्याने स्वत:ला पेटवून घेतले. पेटलेल्या अवस्थेत केदारनाथ याने पत्नी स्नेहल व सासू अनिता सोमनाथ शिंदे (38) यांना मिठी मारली होती. घटनेनंतर केदारनाथचा मृत्यू झाला.
त्यानंतर सासू अनिता शिंदे यांचाही उपचार सुरू असतानाच मृत्यू झाला. पत्नी स्नेहल हिचाही उपचारादरम्यान मृत्यू झाला असून, सोनारी येथे शोकाकुल वातावरणात तिच्यावर अंत्यसंस्कार करण्यात आले. उपनिरीक्षक संजय वाघमारे अधिक तपास करीत आहेत.