संत निवृत्तिनाथ दिंडीमुळे वाहतूक मार्गांत बदल

सिडको : विशेष प्रतिनिधी
संत श्री निवृत्तीनाथ महाराजांची दिंडी आज मंगळवारी प्रस्थान ठेवणार असून, नाशिकमध्ये दिंडीचे आगमन झाल्यानंतर शहरात वाहतूक कोंडी होऊ नये म्हणून शहर वाहतूक विभागातर्फे 12 जून रोजी सकाळी 6.30 पासून ते 14 जून रोजी सकाळी 11 पर्यंत वाहतुकीत विविध बदल आणि निर्बंध लागू करण्यात येणार आहेत.
शहर वाहतूक शाखा युनिट क्रमांक 1, 2, 3 आणि 4 यांच्या हद्दीतून पालखी मार्गक्रमण करणार असून, सातपूर, पंचवटी, नाशिक रोड आणि पळसे गावात पालखीचा मुक्काम तसेच विसावा होणार आहे.पोलीस उपआयुक्त चंद्रकांत खांडवी यांनी मोटार वाहन कायदा कलम 115 आणि 116 (1)(अ)(ब) नुसार दिलेल्या अधिकारांचा वापर करत ही वाहतूक अधिसूचना निर्गमित केली आहे.शहरात येणारी व जाणारी जड वाहने व एसटी बसेस सिन्नर फाटा मार्गे वळवण्यात येणार असून, रुग्णवाहिका, अग्निशमन सेवा आणि पोलीस वाहनांना या आदेशातून वगळण्यात आले आहे. पालखी सोहळ्यामुळे नागरिकांनी पर्यायी मार्गाचा वापर करावा, तसेच वाहतूक पोलिसांच्या सूचनांचे पालन करावे, असे आवाहन वाहतूक विभागातर्फे करण्यात आले आहे.

खालील मार्गांवर वाहतुकीस बंदी

पिंपळगाव बहुला ते सातपूर, आयटीआय सिग्नल ते मोडक सिग्नल, अशोकस्तंभ ते रविवार कारंजा, रविवार कारंजा ते गाडगे महाराज पुतळा मार्गे काजीपुरा चौकी, गणेशवाडी पंचवटी ते अमरधाम, मुक्तीधाम मंदिर समोरील मार्ग इत्यादी. दत्तमंदिर सिग्नल ते बिटको चौक आणि पुढे छत्रपती शिवाजी महाराज पुतळा नाशिक रोड मार्गावर जड वाहने व हातगाड्यांना प्रवेश बंद

पर्यायी मार्ग असा राहील

पर्यायी मार्गांतर्गत मोडक सिग्नल, अशोकस्तंभ, खडकाळी सिग्नल, सारडा सर्कल, जेलरोड, डावीकडे आम्रपालीनगरमार्गे, द्वारका टाकळी रोड, सुराणा हॉस्पिटल, आनंदनगरी टी-पॉइंट मार्ग आदींचा समावेश आहे.