कंटेनरमधून 15 वर्षीय मुलाचे अपहरण

सटाणा ः प्रतिनिधी
पिंगळवाडे येथील वाघदर शिवारात राहणार्‍या पंधरा वर्षीय मुलाला अज्ञात इसमाने काहीतरी कारणाने पारसमणी रोडलाइन्स नाव असलेल्या कंटेनरमध्ये बसून पळून नेण्याचा प्रकार उघडकीस आला आहे. याप्रकरणी जायखेडा पोलीस ठाण्यात अज्ञात व्यक्तीविरोधात गुन्हा दाखल करण्यात आला आहे. पोलिसांनी दिलेल्या माहितीनुसार, संजय भामरे यांचा मुलगा ओम संजय भामरे यास घरी ठेवून बाहेरगावी गेले होते. त्यानंतर सायंकाळी सहा वाजेला संजय भामरे यांच्या आईने मोबाइलवर फोन करून कळवले की ओम घरी नाही. त्यानंतर भामरे यांनी मित्रांकडे विचारपूस केली असता सगळ्यांनी ओम आमच्याकडे आलाच नाही, असे सांगितले, त्यानंतर संजय भामरे शोध घेऊ लागले. शोध घेताना हॉटेल शाहू व तेथील पेट्रोलपंपावर गेले असता पेट्रोलपंपाचे पाठीमागे मुलगा ओमची सायकल दिसून आली. पेट्रोलपंपावरील सीसीटीव्ही फुटेज चेक केले असता त्यात ओम भामरे, पारसमणी रोडलाइन्स नाव असलेले कंटेनरमध्ये बसून जाताना दिसून आले आहे. पुढील तपास पोलिस करीत आहेत.