नाशिक शहरातील बुलेट चोरीचे 6 गुन्हे उघड
सिडको : विशेष प्रतिनिधी
नाशिक शहरातील विविध पोलीस ठाण्यांच्या हद्दीतील वाढत्या मोटारसायकल चोरीच्या घटनांवर नियंत्रण ठेवण्यासाठी पोलीस आयुक्त संदीप कर्णिक यांनी विशेष मोहीम राबवण्याचे आदेश गुन्हे शाखेला दिले होते.त्यानुसार गुन्हे शाखा युनिट क्रमांक 2च्या पथकाने सापळा रचून एका संशयिताला ताब्यात घेतले. त्याची कसून चौकशी केली असता, त्याने शहरात विविध ठिकाणांहून बुलेट चोरीची कबुली दिली. यावेळी संशयिताकडून सुमारे 6 लाख 15 हजार रुपये किमतीच्या 6 बुलेट हस्तगत करण्यात पोलिसांना यश आले आहे.
दि. 28 मे रोजी इंदिरानगर पोलीस ठाण्याच्या हद्दीत पाथर्डी शिवार येथून रात्री 10 वाजेच्या सुमारास बुलेट मोटारसायकल चोरीस गेल्याची फिर्याद दाखल झाली होती. त्यानुसार गुन्हा करण्यात आला होता. गुन्हे शाखा युनिट 2 चे पोलीस उपनिरीक्षक मुक्तारखान पठाण व त्यांच्या पथकाने परिसरातील सुमारे 35 सीसीटीव्ही फुटेज तपासून संशयिताची ओळख पटवली. गुप्त बातमीदारामार्फत मिळालेल्या माहितीनुसार, अभय सुरेश खर्डे (वय 23, रा. झोळे, ता. संगमनेर, जि. अहिल्यानगर) हा एकलहरा रोडवर बुलेट विक्रीसाठी येणार असल्याची माहिती मिळाल्यावर त्याला गवळीबाबा देवस्थानजवळ ताब्यात घेण्यात आले. त्याच्याकडून एक बुलेट (क्र. एमएच 15 जीवाय 6935) व 15 हजारांचा मोबाइल असा एकूण 1 लाख 15 हजार रुपयांचा मुद्देमाल जप्त करण्यात आला. पुढील तपासात त्याच्याविरुद्ध नाशिक शहरात एकूण 6 बुलेट चोरीचे गुन्हे उघडकीस आले. या संशयिताकडून एकूण 6 बुलेट व मोबाइल असा 6 लाख 15 हजार रुपयांचा मुद्देमाल हस्तगत करण्यात आला आहे. तसेच, चोरीची बुलेट खरेदी करणारा अनिकेत शिरीष पठारे (वय 25, रा. दापोडी, जि. पुणे) यालाही अटक करण्यात आली आहे. गुन्हे शाखेच्या तपासात उघडकीस आले आहे की, आरोपी अभय सुरेश खर्डे याच्यावर नाशिक पोलीस आयुक्तालयाच्या विविध पोलीस ठाण्यांमध्ये एकूण 18 बुलेट चोरीचे गुन्हे दाखल आहेत.
ही कारवाई गुन्हे शाखा युनिट क्र. 2 चे सहायक पोलीस निरीक्षक हेमंत तोडकर, डॉ. समाधान हिरे, बाळू शेळके, शंकर काळे, विलास गांगुर्डे, गुलाब सोनार, संजय सानप, नंदकुमार नांदुर्डीकर, सुनील बोडके, चंद्रकांत गवळी, प्रकाश महाजन, अतुल पाटील, परमेश्वर दराडे, वाल्मीक परदेशी, प्रवीण वानखेडे, सुनील खैरनार यांनी केली आहे.