पळाशी : नांदगाव-येवला रस्त्यावर तांदूळवाडी फाट्याजवळ बुधवारी (दि. 18) येवला येथून नांदगावकडे जाणार्या चारचाकी पिकअप (एमएच 15, जेसी 2349) व नांदगावकडून भौरीच्या दिशेने जाणार्या दुचाकी वाहनाचा भीषण अपघात झाला. हा अपघात इतका भीषण होता की, पिकअप रस्त्यावर उलटला. अपघातात भौरी येथील शिवसेनेचे शाखाप्रमुख आप्पासाहेब खंडू भिलोरे (वय 55) यांचा मृत्यू झाला. अपघाताचे वृत्त समजताच घटनास्थळी नागरिकांनी धाव घेतली. अपघाताची माहिती नांदगाव पोलिसांना कळताच पोलिसांनी घटनास्थळी धाव घेतली. अपघातास कारणीभूत ठरलेल्या चारचाकी वाहनचालकाविरोधात गुन्हा दाखल करण्याचे काम सुरू होते. अपघातात मृत्यू झालेले आप्पासाहेब भिलोरे हे भौरी (ता. नांदगाव) येथील शिवसेनेचे शाखाप्रमुख, तसेच प्रगतिशील शेतकरी होते.