रिक्षाचालकाने महिला, पुरुषाला केली मारहाण
सिडको : विशेष प्रतिनिधी
जिल्हा शासकीय रुग्णालयानजीक एका रिक्षावाल्याने प्रवाशाला काठीने मारहाण केल्याचा व्हिडीओ, तसेच पंचवटीतील दिंडोरी नाका परिसरात एका महिलेला रिक्षाचालकाने केलेल्या मारहाणीचा व्हिडीओ सोशल मीडियावर झळकला आहे. या दोन्ही घटनांमुळे नागरिकांमध्ये तीव्र संतापाची लाट उसळली आहे.
शहरात रिक्षा व्यवसायात बिनधास्तपणे फोफावणार्‍या गुन्हेगारी प्रवृत्तीविरोधात पोलिसांनी आपला मोर्चा वळविला आहे. परिणामी रिक्षाचालकांमध्ये भीतीचे वातावरण निर्माण झाले आहे. दरम्यान, अंबड पोलीस ठाण्याचे वरिष्ठ पोलिस निरीक्षक जग्वेंद्रसिंग राजपूत यांच्या मार्गदर्शनाखाली अंबड पोलीस ठाण्याच्या हद्दीत आरटीओच्या नियमांचे वारंवार उल्लंघन करणार्‍या आणि नागरिकांच्या सुरक्षिततेला धोका निर्माण करणार्‍या मुजोर रिक्षा चालकांविरोधात पोलिसांनी धडक कारवाई राबवली. या कारवाईअंतर्गत सुमारे 25 हून अधिक रिक्षा जप्त करण्यात आल्या. ही कारवाई पूर्णतः कायदेशीर प्रक्रियेनुसार आणि वाहतूक नियमांचे काटेकोर पालन करून करण्यात आली आहे. शहरात रिक्षाचालकांच्या वाढत्या गैरकृत्यांमुळे नागरिकांमध्ये निर्माण झालेली असुरक्षिततेची भावना लक्षात घेता, पोलिसांनी तत्काळ हस्तक्षेप करून केलेली ही कारवाई आवश्यक आणि योग्य होती.पोलिसांनी दाखवलेली तत्परता आणि कायद्याची अंमलबजावणी यामुळे रस्त्यावरील बेदरकार वर्तनाला आळा बसण्यास मदत होणार आहे.
कायदा सर्वांना समान असून, त्याचे उल्लंघन करणार्‍यांवर कठोर कारवाई केली जाईल, हा स्पष्ट संदेश पोलिसांनी या कारवाईद्वारे दिला आहे.शहरात कायदा व सुव्यवस्था अबाधित राखण्यासाठी आणि गुन्हेगारीला आळा बसवण्यासाठी पोलिसांकडून करण्यात आलेल्या या कारवाईचे नाशिककर नागरिकांनी खुलेपणाने स्वागत केले असून, पोलिस दलाच्या कार्यक्षमतेचे कौतुक होत आहे.