निफाड ः तालुका प्रतिनिधी
तालुक्यातील शिवापूर, देवगाव, नैताळे यापाठोपाठ आता सायखेडा येथील लक्ष्मीनारायण मंदिरातील मौल्यवान वस्तू चोरट्यांनी लंपास केल्याची घटना समोर आली आहे. तालुक्यात देवस्थानांना लक्ष्य करण्याच्या सलग घटना घडत असल्याने नागरिकांच्या भावना दुखावल्या आहेत. पोलिसांसमोर चोरट्यांनी आव्हान उभे केले आहे.
पुजारी सुमित जगदीश तिवारी (वय 38, रा. सायखेडा) यांनी दिलेल्या फिर्यादीत, मंदिराच्या दरवाजाची चावी माझ्याकडे असते व दुसरी चावी मंदिरासमोरील तटबंदीजवळील महावितरणच्या पेटीत ठेवलेली असते. 11 डिसेंबरला सकाळी आठला मी मंदिर उघडल्यावर मौल्यवान साहित्य चोरीस गेल्याचे लक्षात आले. त्याचबरोबर समोरील दुसरी चावी ठेवलेला महावितरणची पेटी उघडलेली व चावी खाली पडलेली दिसली. या घटनेबाबत मंदिराचे खर्च पाहणारे श्रीनिवास काशीनाथ काबरा (रा. सायखेडा) तसेच मंदिराचे वारसदार
सर्वेश मालपाणी (रा. वावी) आणि संतोष केला (रा. गांधीनगर, नाशिकरोड) यांना विचारले असता, त्यांना काही माहिती नसल्याचे सांगितले. चोरट्याने पेटीतील चावी वापरून मंदिराचे कुलूप उघडून गुरुवारी (दि. 10) सायंकाळी 6.30 पासून ते शनिवारी सकाळी आठच्या दरम्यान आत प्रवेश केला. मंदिरातून 20 ग्रॅम वजनाची 2100 रुपये किमतीची चांदीची साखळी, 35 ग्रॅम वजनाची 3500 रुपये किमतीची चांदीची पिंड, नऊ किलो वजनाचा 4,500 रुपये किमतीचा पितळी घंटा, एक हजाराची पितळी पंचारती, तसेच देवीच्या मूर्तीवरील एक ग्रॅम सोन्याचे 9500 रुपये किमतीचे मणी-मंगळसूत्र असा एकूण 20 हजार 600 रुपये किमतीचा ऐवज लंपास केल्याचे म्हटले आहे. फिर्यादीवरून सायखेडा पोलीस ठाण्यात व्यक्तीविरोधात गुन्हा नोंदविला आहे.