सटाणा : तालुका प्रतिनिधी
येथील देवमामलेदार श्री यशवंतराव महाराज यात्रोत्सवानिमित्त सोमवारी (दि. 15) मंदिरात पहाटे महापूजा, दुपारी रथ मिरवणूक, तसेच विविध कार्यक्रम होणार आहेत. भाविकांमध्ये उत्साहाचे वातावरण आहे.
सोमवारी पहाटे चारला बागलाणचे तहसीलदार कैलास चावडे व प्रतिभा चावडे, सनपा प्रशासक तथा मुख्याधिकारी ज्योती भगत-पाटील व स्वप्नील पाटील, तसेच देवस्थानचे अध्यक्ष भालचंद्र बागड व अरुणा बागड आदींच्या हस्ते देवमामलेदार श्री यशवंतराव महाराज मंदिरात महापूजा आयोजित केली आहे. दुपारी तीनला पोलीस उपअधीक्षक यशवंत बाविस्कर, पोलीस निरीक्षक योगेश पाटील आदींसह पोलीस विभागाचे अधिकारी, कर्मचारी तसेच इतर पदाधिकार्‍यांच्या प्रमुख उपस्थितीत रथ मिरवणुकीस प्रारंभ होणार आहे.
पंधरा दिवसांच्या कालावधीत यात्रोत्सवात अन्नदान, कुस्ती दंगल, दहीकाला व कीर्तन असे विविध कार्यक्रम होणार आहेत. यशवंत लीलामृत पारायण सोहळ्यात भाविकांनी मोठ्या संख्येने सहभाग घेतला. यात्रोत्सवात पाळणे, हॉटेलसह विविध दुकाने थाटण्यात आली आहेत. भाविकांनी मोठ्या संख्येने सहभागी व्हावे, आवाहन देवस्थानतर्फे केले आहे.