सिडको : प्रतिनिधी
महापालिकेकडून सिडकोतील शिवशक्ती चौक परिसरात नवीन जलवाहिनी टाकण्याचे काम सुरू करण्यात आले आहे. मात्र, हे काम करताना काही महिन्यांपूर्वीच लाखो रुपये खर्च करून तयार करण्यात आलेला सिमेंट काँक्रीटचा रस्ता खोदण्यात आल्याने नागरिकांनी संताप व्यक्त केला आहे. रस्त्यालगत पर्यायी जागा उपलब्ध असतानाही नव्याने तयार झालेला रस्ता फोडून पाइपलाइन टाकण्याचे काम सुरू असल्याने महापालिकेच्या नियोजनशून्य कारभारावर प्रश्नचिन्ह उपस्थित केले जात आहे.
प्रभाग 26 मधील शिवशक्ती चौक व नवजीवन डे स्कूल परिसरात गेल्या अनेक महिन्यांपासून नागरिकांना पिण्याच्या पाण्याची तीव्र टंचाई जाणवत आहे. नागरिकांना सुरळीत पाणीपुरवठा व्हावा यासाठी स्थानिक लोकप्रतिनिधी व पाणीपुरवठा विभागाच्या माध्यमातून नव्या जलवाहिनीचे काम हाती घेण्यात आले आहे. ही बाब स्वागतार्ह असली तरी जलवाहिनी टाकताना पर्यायी मोकळ्या जागेचा वापर न करता थेट नव्याने तयार झालेला सिमेंट काँक्रीटचा रस्ता फोडण्यात आला आहे. काही महिन्यांपूर्वीच महापालिकेने नागरिकांच्या कराच्या पैशांतून लाखो रुपये खर्च करून हा रस्ता तयार केला होता. आता त्याच रस्त्याची तोडफोड होत असल्याने सार्वजनिक निधीचा अपव्यय झाल्याची भावना नागरिकांनी व्यक्त केली आहे. जलवाहिनीच्या कामामुळे रस्त्याची मोठ्या प्रमाणात हानी झाली असून संबंधित ठेकेदार व महापालिकेच्या कामकाजाबाबत नागरिकांकडून नाराजी व्यक्त केली जात आहे.
New cement road dug for water pipeline work