सिडको : विशेष प्रतिनिधी
गावठी बनावटीचा कट्टा आणि दोन जिवंत काडतुसे बाळगणार्या सराईत आरोपीला भद्रकाली पोलिसांच्या गुन्हे शोध पथकाने शिताफीने अटक केली. श्रीजय उर्फ गौरव संजय खाडे (वय 28, रा. पाटील गल्ली, भद्रकाली, जुने नाशिक) असे अटक करण्यात आलेल्या आरोपीचे नाव आहे. त्याच्याकडून 37 हजार रुपये किमतीचा गावठी कट्टा आणि दोन जिवंत काडतुसे जप्त
करण्यात आली.
भद्रकाली पोलीस ठाण्यातील गुंडा रजिस्टरवरील आणि मागील दोन महिन्यांपासून फरार असलेला आरोपी श्रीजय खाडे हा शितळादेवी मंदिर ते संत गाडगेबाबा धर्मशाळा रोडवरील साईबाबा मंदिराजवळ कट्टा घेऊन उभा असल्याची गोपनीय माहिती पोलिसांना मिळाली. त्यानुसार पोलीस हवालदार सतीश साळुंके, कय्युम सय्यद, पोलीस शिपाई नीलेश विखे आणि अविनाश थेटे यांनी घटनास्थळी धाव घेतली.पोलिसांना पाहताच आरोपीने पळून जाण्याचा प्रयत्न केला. मात्र, पोलिसांनी त्याचा पाठलाग करून त्याला ताब्यात घेतले. अंगझडतीत त्याच्याकडून एक देशी बनावटीचा कट्टा आणि दोन जिवंत काडतुसे जप्त करण्यात आली. याप्रकरणी भद्रकाली पोलीस ठाण्यात गुन्हा दाखल करण्यात आला आहे.
Villager arrested for carrying live cartridges, innkeeper accused arrested