बोगस पनीरच्या चर्चेने संशय गडद; ग्राहकांमध्ये भीती
इगतपुरी : प्रतिनिधी
नाशिक-मुंबई महामार्गालगतच्या हॉटेल्स आणि ढाब्यांवरून पनीरचे पदार्थ अचानक गायब झाल्याने प्रवाशांमध्ये प्रश्नचिन्ह निर्माण झाले आहे, तर काही हॉटेलचालकांनी पनीरच्या भाज्यांवर थेट 30 ते 40 रुपयांची भाववाढ केल्याने ग्राहकांमधून तीव्र नाराजी व्यक्त
होत आहे.
तालुक्यातील काही गावांमध्ये बोगस पनीर तयार केले जात असल्याच्या चर्चांना गेल्या काही दिवसांपासून उधाण आले आहे. कमी दरात निकृष्ट दर्जाचे पनीर पुरवले जात असल्याची माहिती समोर आल्यानंतर, अचानक अनेक नामांकित हॉटेल्स आणि ढाब्यांवर “पनीर उपलब्ध नाही” असे बोर्ड पाहायला मिळत आहेत. पनीर बटर मसाला, कढाई पनीर, पनीर टिक्का यांसारखे लोकप्रिय पदार्थ मेन्यू कार्डवरून गायब झाल्याने, “आतापर्यंत आपण नेमके काय खात होतो?” असा संतप्त सवाल नागरिक उपस्थित करत आहेत.
विशेष म्हणजे, तालुक्यात दररोज मोठ्या प्रमाणावर पनीरची विक्री होते. मात्र, या पनीरची गुणवत्ता आणि परवान्यांबाबत कोणतीही स्पष्ट माहिती उपलब्ध नाही. बोगस पनीरच्या अफवांनंतर अचानक निर्माण झालेल्या या तुटवड्यामुळे संशयाचे ढग अधिक गडद झाले आहेत.
या संपूर्ण गंभीर प्रकरणानंतरही अन्न व औषध प्रशासनाकडून अद्याप कोणतीही मोठी तपासणी मोहीम किंवा छापेमारी झाल्याचे दिसत नाही. त्यामुळे प्रशासनाच्या भूमिकेवरही प्रश्नचिन्ह उपस्थित होत आहे. स्थानिक ग्राहक संघटना आणि सामाजिक कार्यकर्त्यांनी या प्रकरणाची तातडीने चौकशी करून पनीरचे नमुने तपासण्याची आणि दोषींवर कठोर कारवाई करण्याची मागणी केली आहे. ग्राहकांच्या आरोग्याशी खेळ करणार्‍या या रॅकेटचा पर्दाफाश कधी होणार, याकडे आता सर्वांचे लक्ष
लागले आहे.
Has paneer disappeared from dhabas along the Mumbai highway?